Փաստ ինֆո

Վերջին 2 տարիների ընթացքում ՀՀ քաղաքացիների բախտը բերել է և երկիրը խնայողություններ ունի, որն այս պահին կազմում է 385 մլրդ դրամ։ Դրանից մոտավորապես 150 մլրդը ազատ ծախսելու համար նախատեսված չէ, սակայն մոտավորապես 200 մլրդը Կառավարությունը կարող է ծախսել ժողովրդին աջակցելու համար: Այս մասին այսօր ԱԺ ամբիոնից ասաց «Լուսավոր Հայաստան» խմբակցության ղեկավար Էդմոն Մարուքյանը:

Անդրադառնալով իր առաջարկին, թե թոշակառուների թոշակն այս ընթացքում պետք է կրկնապատկել և անապահով 500 ընտանիքներին էլ տալ 100 հազար դրամ՝ Մարուքյանն ասաց, որ այս ծրագրի համար ծախսվող գումարը 100 մլրդ դրամը չի անցնում:

«Մեր կառավարության սիրելի գործընկերներն ասում են, որ սա պոպուլիզմ է: Պոպուլիզմ կլիներ, եթե քաղաքացիները դրա կարիքը չունենային մենք ասեինք տվեք, կամ էլ գումարը չլիներ, բայց մենք ասեինք տվեք: Եթե մայիս ամսին տնտեսությունը բացում ենք՝ 1000-ավոր մարդիկ արձանագրում են, որ այն աշխատատեղերը, որ ունեին մինչ կորոնավիրուսը՝ հիմա չկա: Ի՞նչ է սպասվում այս մարդկանց: 4300 բաժանորդի լույսն անջատել են, 700-ից ավելին բաժանորդի դեպքում էլ գազն է անջատվել: 1000-ավոր մարդիկ էլ իրենց տան սննդի վերջին գումարը վճարել են, որպեսզի իրենց երեխան կարողանա դաս անի, լույս ունենան տանը»,-ասաց Մարուքյանը:

Նա արձանագրեց, որ երբ կառավարությանը հարցնում է, թե ՀՆԱ-ի քանի տոկոսն են պատրաստվում ծախսել, իր հարցին չեն պատասխանում, սակայն ամբողջ աշխարհում տարբեր երկրներ տարբեր ցուցանիշներով իրենց ՀՆԱ-ի 5-ից 16 տոկոսը ծախսել են:

«Դուք ասեք՝ ում գումար չեք տալիս ու տվեք բոլոր նրանց, ովքեր թիրախային խմբում չկան: Այո կարող է մի քանի ընտանիք դրա կարիքը չունենա, բայց ստանա այդ 100 հազար դրամը, բայց ի՞նչ կա դրա մեջ, մեր քաղաքացին չէ՞, մեր հարկատուն չէ՞...այս մարդկանց ասում էիք՝ եկեք քվեարկությանը մասնակցեք, բայց հիմա սոված տանը նստած են, իրենց գազն ու լույսն անջատում են, դուք գումար ունեք, բայց դա չեք տալիս մարդկանց»,-ասաց ԼՀԿ ղեկավարը:

Աղբյուր` Փաստինֆո