Փաստ ինֆո

Ազգային ժողովը քննարկում է «Հայաստանի Հանրապետության 2020 թվականի պետական բյուջեի մասին» օրենքում փոփոխություն եւ լրացումներ կատարելու մասին օրենքի նախագիծը, որը ներկայացրել է կառավարությունը:

Ֆինանսների նախարար Ատոմ Ջանջուղազյանն ասաց, որ Կառավարությունը 2020 թ պետական բյուջեում փոփոխություն է նախաձեռնել, որպեսզի հնարավորություն ունենա հարկաբյուջետային քաղաքականությունը որպես գործիք լիարժեքորեն ծառայեցնել համավարակի ազդեցության մեղմանն ու հետագայում նաև վերականգնմանը՝ ֆինանսական ու տնտեսական առումով:

«Եթե համավարակի հետևանքով առաջացած շոկերին անդրադառնանք, ապա ակնհայտ է, որ արտաքին շոկերը նաև իրենց ազդեցությունն են ունեցել Հայաստանի տնտեսության վրա՝ հաշվի առնելով, որ Հայաստանի տնտեսությունը գնահատվում է բաց և առայժմ համեմատաբար փոքր»,-Ջանջուղազյանն ու հայտնեց, որ ստեղծված իրավիճակի արդյունքում ակնհայտորեն արտահանման կրճատման դրսևորումներ կլինեն, դրամական փոխանցումների ներհոսքը կնվազի և տուրիզմի կրճատում կլինի:

Ֆինանսների նախարարը հիշեցրեց, որ «2020 թվականի բյուջեի մասին օրենքով» հաստատվել են բյուջետային այն ցուցանիշները, որոնց հիմքում ընկած էր տնտեսական աճի 4,9 տոկոս մեծությամբ կանխատեսում, իսկ առաջարկվող նախագծով ենթադրվում է, որ կլինի 2 տոկոս անկում:

«Նախատեսվում է նաև քաղաքականության միջոցառումների իրականացնում օգտագործելով հարկաբյուջետային քաղաքականությունը որպես գործիք նպատակ ունենալով տնտեսական սպասվող բացասական ազդեցությունը մեղմել ու ստեղծել նախադրյալներ արագ վերականգնման համար: Ըստ էության, մոտավորապես 150 մլրդ դրամանոց փաթեթ է առաջարկվում հավանության արժանացնել, որտեղ 25-ական միլիարդ դրամ ենթադրվում է, որ պայմանական բաժամամբ կօգտագործվեն տնտեսական խնդիրների մեղման կամ ընթացիկ իրացվելիության խնդրի լուծման նպատակով և սոցիալական խնդիրների մեղման համար: Մոտ 80 մլրդ դրամ ենթադրվում է, որ կօգտագործվի տնտեսական երկարաժամկետ զարգացմանն ուղղված ծրագրերի ֆինանսավորման համար և 20 մլրդ դրամ՝ ըստ անհրաժեշտության պահուստային միջոցներ վերաբաշխելու համար»,-ասաց Ջանջուղազյանը:

Նա ընդգծեց, որ այս սցենարի դեպքում պարտք ներգրավվելու կարիքը կազմում է մոտավորապես 260 մլրդ դրամ:

«Այդ նպատակով առաջարկվում է փոփոխություն այս տարվա բյուջեում, այն իմաստով, որ տրվեն որոշակի հնարավորություններ գերազանցել այն սահմանափակումները, որոնք բնական վիճակում սահմանված են կարգավորումներով և պետք է պահպանվեն բյուջեի կատարման ընթացքում և սահմանել առավելագույն պակասորդի չափ 324 մլրդ դրամի չափով, որը կկազմի կանխատեսվող համախառն ներքին արդյունքի 5 տոկոսը»,-ասաց նախարարը:

Աղբյուր` Փաստինֆո