Փաստ ինֆո

«Փող բաժանելու» հարցում պետք է լինի տրամաբանություն և այսօր որոշակի տրամաբանությամբ 14 ծրագիր է գործում: Այո, ոչ բոլորին է դա հասանելի ու ոչ բոլորին է դուր գալիս, բայց 48 մլրդ դրամի գումար է բաժանվում մի քանի հարյուր հազար մարդու: Այս մասին այսօր ԱԺ ամբիոնից ասաց «Իմ քայլը» խմբակցության պատգամավոր, ԱԺ փոխնախագահ Ալեն Սիմոնյանը:

Դիտարկմանը, թե Կառավարությունը պետք է կարողանա կանխատեսումներ անել ու հետագա քայլերը որոշել՝ Ալեն Սիմոնյանը պատասխանեց հարցնելով, թե այդ որ Կառավարություններ է այսօր կարողանում կորոնավիրուսի հետ կապված կանխատեսումներ անել:

Անդրադառնալով ԱԺ «Լուսավոր Հայաստան» խմբակցության ղեկավար Էդմոն Մարուքյանի հայտարարությանը, թե վերջին 2 տարիների ընթացքում ՀՀ քաղաքացիների բախտը բերել է և երկիրը խնայողություններ ունի, Սիմոնյանն ասաց. «Խոսելիս նույնիսկ լեզուն չի պտտվում, որ ասի Կառավարությունը երկու տարի լավ է աշխատել, գումար է ձևավորվել, ասում է՝ բախտի բերմամբ, ի՞նչ բախտի բերմամբ, բա խի՞ չեք բախտի բերմամբ նման գումար աշխատում կամ մի հաջողություն ունենում: Դա բախտի բերմամբ չէ, դա Կառավարության շարունակական աշխատանքի հետևանքն է։ Նենգափոխելով ու ֆոկուսներ անելով ոչ ոք առաջ չի գնա»:

Նա շեշտեց, որ կլասիկ քաղաքական գործչի համար նման հայտարարություններն անլուրջ են:

«Նման մի կուսակցություն կար ժամանակին այս դահլիճում՝ ՕԵԿ էր կոչվում, ավանդների հետ կապված այնքան խոսեց՝ 2 տարի ընտրվեց: Ավանդները ոչ ոք այդպես էլ չստացավ, բայց 2 տարի ասացին ավանդ, ավանդ, ավանդ ու ընտրվեցին: Այ սա է պոպուլիզմը»,-ասաց Սիմոնյանն ու շեշտեց, որ ներկայիս իշխանությունը երբեք քաղաքացիներին չի խաբել, չի փորձել լավը թվալ ու իրավիճակից էժան դիվիդենտներ քաղել:

Աղբյուր` Փաստինֆո