Փաստ ինֆո

Ամբողջ աշխարհում երկրներն արդեն սկսել են կամաց-կամաց սահմանափակումները թուլացնել: Ամբողջ մտավախությունն այն է, որ այդ թուլացումը միանգամից չբերի վարակի երկրորդ ալիքի, որը կարող է կոլապսի ենթարկել առողջապահական համակարգը: «Փաստինֆո»-ի հետ զրույցում ասաց բժիշկ-համաճարակաբան Արշակ Պապոյանը անդրադառնալով վարչապետի այն հայտարարությանը, որ 10 օրից սահմանափակումները հանվելու են:

Համաճարակաբանը նկատեց վերջին 10 օրվա ընթացքում կարանտինը, տեղաշարժի սահմանափակումներն առանձնապես չեն գործում, քանի որ բակերում, փողոցներում շատ մարդիկ կան: Ավելին վերջին մի քանի օրերին Կենտրոնում կրկին խցանումներ են առաջանում, հետևաբար Արշակ Պապոյանը գտնում է, որ սահմանափակումները պետք է աստիճանաբար հանել, սակայն կան տարբեր խնդիրներ, որոնք պետք է ուշադրության կենտրոնում պահել. «Վերջին շրջանում բավական շատացան դեպքերը, երբ կորոնավիրուսի դեպքեր արձանագրվեցին բուժաշխատողների շրջանակում, այդ թվում Էրեբունու հիվանդանոցում, Վարդենիսում, Ֆանարջյանում: Սա ամբողջ աշխարհում է լուրջ խնդիր և որտեղ էլ նայենք, վարակված բուժաշխատողների տոկոսը բավական մեծ է: Դա մտահոգիչ է, քանի որ երբ բժիշկն է հիվանդանում, դա ավելի լուրջ խնդիր է: Ենթադրենք ինչ-որ գյուղում ամբուլատորիայի բժիշկ է հիվանդանում, այնպես չէ, որ շատ են բժիշկներն այնտեղ: Մեկ կամ առավելագույնը երկուսը կարող են լինել և եթե մեկը հիվանդանում է, ստացվում է, որ ամբողջ գյուղը մնում է առանց բժշկի: Նույն գյուղում մարդիկ տարբեր հարցերով կարող են դիմել, այնպես չէ, որ մարդիկ այս ընթացքում ոչ մի այլ հիվանդությունով չեն հիվանդանում և մենակ կորոնավիրուսն է: Հետևաբար բժշկական հաստատություններում պետք է ներդրվեն հատուկ ընթացակարգեր, որոնք կպաշտպանեն բուժաշխատողներին վարակվելուց»,-ասաց համաճարակաբանը:

Վերջինս ընդգծեց անկախ նրանից բուժհաստատությունը կլինի կորոնավիրուսի բուժման համար նախատեսված հիվանդանոց, թե պարզապես քաղաքային պոլիկլինիկա, պետք է մշակվեն և ներդրվեն ստանդարտ գործողությունների ընթացակարգեր. «Կորոնավիրուսը չի անհետանալու: Այն մնալու է և սահմանափակումները հանեն-չհանեն մենք շարունակելու ենք շփվել, ամբողջ իմաստն այն է, որ այդ շփման ընթացքում մաքսիմալ քիչ մարդ վարակվի, որպեսզի այդպիսի մեծ ծանրաբեռնվածություն բժշկական կազմակերպության վրա չլինի: Հետևաբար` կարևոր է բուժաշխատողներին պաշտպանել, որպեսզի չհիվանդանան և կարողանան կատարել իրենց պարտականությունները: Այս տեսանկյունից կարևորում եմ նմանատիպ ընթացակարգերի մշակումը, որը ՁԻԱՀ-ի կենտրոնի մեր մասնագիտական խումբը պատրաստ է մշակել, եթե պատկան մարմինների կողմից նման ցանկություն լինի»,-ասաց Արշակ Պապոյանը:

Հարցին արդյոք կարող ենք համարել, որ մեզ մոտ առաջին ալիքն անցել է, համաճարակաբանն ասաց, որ սկզբունքորեն այն չի անցել: Տարածման տեմպը սահմանափակման որոշակի միջոցառումների հաշվին ինչ-որ իմաստով դանդաղել է: Արշակ Պապոյանի խոսքով մեր երկրի դեպքում ոչ թե կարող ենք ունենալ վարակի երկրորդ ալիք, այլ պարզապես կարող ենք ունենալ միանգամից մեծ քանակով հիվանդներ, որոնց թիվը կգերազանցի առողջացածների թվին. «Տարբեր երկրներում ավելի լուրջ ավելացման սպասում են աշուն-ձմեռ ժամանակաշրջանում, որովհետև այդ շրջանում նաև բարձրանում է սուր-ռեսպիրատոր շնչառական հիվանդության տեմպը բնակչության շրջանում: Այսինքն` եղած կորոնավիրուսին ավելանալու են նաև գրիպ և նմանատիպ հիվանդություններ, ինչն ավելի մեծ ծանրաբեռնվածություն կարող ստեղծել առողջապահական համակարգի համար: Դրա համար էլ ամբողջ նպատակն այն է, որ կորոնավիրուսի հետ կապված հարցը մաքսիմալ նվազեցնեն»,-հավելեց Արշակ Պապոյանը:

Դե իսկ սահմանափակումները հանելն անխուսափելի է, մարդիկ պետք է վերադառնան իրենց առօրյա կյանքին, բայց սովորելով պահպանել սոցիալական հեռավորությունը, հիգիենայի կանոնները:

Աղբյուր` Փաստինֆո