Փաստ ինֆո

Փաստաբան Սեդա Սաֆարյանի դստերը, դստեր ամուսնուն, նրա քրոջն ու ծնողներին ծեծելու դեպքի առթիվ հարուցված քրեական գործով այս պահին քննչական գործողություններ չեն կատարվում։ «Փաստինֆո»-ի հարցմանն ի պատասխան դատախազությունից հայտնեցին, որ քրեական գործը դեռևս նախաքննություն իրականացնող մարմին չի ուղարկվել։

Հիշեցնենք, որ երեկ գլխավոր դատախազի խորհրդականը հայտարարել էր, որ ապրիլի 25-ին միջադեպի առթիվ հարուցվել է քրեական գործ։ «Երևան քաղաքի Մուշ թաղամասում ապրիլի 24֊ի երեկոյան փաստաբան Սեդա Սաֆարյանի հարազատների հետ կապված միջադեպի առթիվ, դատախազի հանձնարարությամբ երեկ Ոստիկանության Մալաթիայի բաժնում հարուցվել է քրեական գործ՝ ՀՀ քրեական օրենսգրքի 258֊րդ հոդվածի 3-րդ մասի հատկանիշներով»,- ապրիլի 26-ին ֆեյսբուքում գրել էր դատախազության պաշտոնյան։

Մամուլում շրջանառվող տեղեկատվության համաձայն՝ ոստիկանները պարզել են Սաֆարյանի հարազատներին ծեծի ենթարկողների ինքնությունը՝ նրանք երեքն են՝ 24-ամյա Արման Գրիգորյանը, 25-ամյա Մնացական Եղոյանը Սեբաստիայի բնակիչներ են և 22-ամյա Փաշիկ Կուլիջանյանը՝ Տիչինայի փողոցի: Երեք երիտասարդներից երկուսն ինքնակամ ներկայացել են ոստիկանություն, իսկ մյուս երիտասարդին հայտնաբերելու ուղղությամբ միջոցառումներ են իրականացվում: «Փաստինֆո»-ն փորձեց պարզել, որ եթե կասկածվողների ինքնությունը պարզվել է, ապա ինչ դատավարական կարգավիճակ ունեն, պարզվե՞լ է արդյոք շարժառիթը, մասնավորապես փաստաբանի դստեր ու փեսայի ընտանիքի անդամների նկատմամբ կատարված ոտնձգությունը կապ ունի՞ փաստաբանի մասնագիտական գործունեության հետ, թե ոչ։

Ոստիկանությունից հայտնեցին, որ քրեական գործը այլեւս իրենց վարույթում չէ, ուղարկել են դատախազություն, իսկ դատախազության լրատվական ծառայությունից խոստացան ճշտել տեղեկատվությունը, թե արդյոք ենթադրյալ հանցագործություն կատարած անձանց ինքնությունը պարզվել է, բայց այդպես էլ պաշտոնապես որեւէ տեղեկատվություն չտրամադրվեց։

Ոչ պաշտոնական տվյալների համաձայն, կամ ինչպես հայտնում է shamshyan.com-ը՝ ինքնակամ ներկայացած երիտասարդները բացատրություն են տվել ու հեռացել։ Ինչ են հայտնել, ինչից է ծագել վիճաբանությունը չի մանրամասնվում։

Իսկ քանի որ այս պահին հայտնի չէ նաեւ վարույթն իրականացնող մարմինը՝ փաստացի քննություն չի կատարվում, շարժառիթների վերաբերյալ էլ վարկածներ են մշակում ու շրջանառում ոչ պաշտոնական մարմինները։

Աղբյուր` Փաստինֆո