Փաստ ինֆո

Որևէ քաղաքական իշխանություն չի կարող որոշել՝ ՓՊ-ում ով է լինելու նախագահ, ովքեր են լինելու ղեկի շուրջ,- «Փաստինֆո»-ի հետ զրույցում ասել է Հանրային պաշտպանի գրասենյակի ղեկավարի տեղակալ Արմինե Ֆանյանը՝ անդրադառնալով հանրային խորհրդի նախագահ Ստեփան Սաֆարյանի գրառմանը։

Հիշեցնենք՝ ապրիլի 24-ին մի խումբ քաղաքացիներ փորձել են այցելել Հայոց ցեղասպանության զոհերի հուշահամալիր եւ նրանց նկատմամբ կազմվել են վարչական իրավախախտման վերաբերյալ արձանագրություններ, որոնց ենթադրաբար հաջորդելու են վարչական տույժ նշանակելու մասին որոշումներ: ՀՀ ՓՊ նախագահ Արա Զոհրաբյանը հայտարարել էր մի խումբ փաստաբաններ պատրաստակամ են նշված քաղաքացիներին իրավաբանական օգնություն ցուցաբերել անվճար։ Հանրային խորհրդի նախագահ Ստյոպա Սաֆարյանը ֆեյսբուքյան իր էջում արձագանքել էր Փաստաբանների պալատի այս նախաձեռնությանը՝ գրելով. «Ինչպիսի «մարդասիրական» ակտ ՀՀ Փաստաբանների պալատի նախագահ Արա Զոհրաբյանի կողմից․․․Չեմ հիշում, որ որևէ անփող, անտեր մեկի համար անվճար խորհրդատվական օգնություն տրամադրվի, այսպես հրապարակայնորեն փաստաբանների խումբ հավաքվի։Այ հիմա կասեմ՝ փոփոխությունները Փաստաբանների պալատում օդ ու ջրի նման անհրաժեշտ են։ Հնարավորինս՝ շուտ ու արտահերթ։ Այնտեղ այլևս չպետք է լինեն Ռոբերտ Քոչարյանի ու Սերժ Սարգսյանի փաթեթները»:

Արմինե Ֆանյանը Հանրային խորհրդի նախագահ Ստեփան Սաֆարյանի հայտարարությունը որակեց չփաստարկված ու անհիմն՝ նշելով, որ ՓՊ-ն պարբերաբար հանդես գալիս է նման նախաձեռնություններով, եթե որեւէ հանրային իրադարձության, միջոցառման ժամանակ տուժել են քաղաքացիների իրավունքները, ոտնահարվել նրանց օրինական շահերը։ «Ես չեմ հասկանում՝ կամ այդ ամեն ինչը չի տեսնում համապատասխան պաշտոնատար անձը, կամ ընդհանրապես չի ցանկանում տեսնել:Եթե չի ցանկանում տեսնել, կարծում եմ, դա իր խնդիրն է»,- ասաց Ֆանյանը:

Նրա խոսքով՝ Փաստաբանների պալատն ամբողջապես անկախ կառույց է և որևէ պետական հիմնարկի և կառույցի մեջ չի մտնում, չի վերահսկվում պետական կառույցի կողմից։

«Ամբողջովին ինքնակազմակերպվող, ինքնակառավարվող կառույց է և Փաստաբանների պալատում որոշում են փաստաբանները՝ իրենց ձայնը այս կամ այն թեկնածուի օգտին տալով: Որևէ քաղաքական իշխանություն չի կարող որոշել՝ ՓՊ-ում ով է լինելու նախագահ, ովքեր են լինելու ղեկի շուրջ, ովքեր են որոշելու կամ լուծելու փաստաբանների խնդիրները կամ փաստաբանների առջև ծառացած որոշակի խոչընդոտներ»,- ասաց Ֆանյանը՝ մեկնաբանելով ՓՊ-ի ղեկավար կազմի փոփոխության անհրաժեշտության մասին Սաֆարյանի դիտարկումը:

Ինչ վերաբերում է Հանրային խորհրդի նախագահի՝ «Ռոբերտ Քոչարյանի ու Սերժ Սարգսյանի փաթեթներ» ձեւակերպմանը՝ Ֆանյանը նշեց, որ «փաթեթներ» բառը նույնիսկ չի ցանկանում կրկնել, որովհետև դա ոչ միայն պաշտոնատար անձին ոչ վայել պահվածք է, նույնիսկ չգիտի, թե ինչ որակում տալ դրան:

«Փաստաբանների պալատը ցանկացած դեպքում ազատ է եղել արտահայտելու իր դիրքորոշումը ցանկացած իշխանության օրոք: Ե՛վ իր կողմից նշված անձանց իշխանության օրոք, և՛ ներկայիս իշխանության օրոք Փաստաբանների պալատը բացարձակ անկաշկանդ է և որևէ հարցում չի եղել այնպիսի դեպք, որ լռի կամ չցանկանա այդ իրավիճակին արձագանքել: Նման բան չի եղել, չկա և ես համոզված եմ, որ չի էլ լինելու երբեք, որովհետև սա շատ կայացած համայնք է և այստեղ բոլորը շատ բարձր իրավագիտակցությամբ օժտված անձինք են»,- ասաց Ֆանյանը՝ հավելելով, որ նման տեսակի ստատուսային հայտարարություններին պետք չէ լուրջ վերաբերվել:

Ֆանյանի կարծիքով՝ ամեն խոսք պետք է լինի կշռադատված և փաստարկված, մանավանդ, եթե այդ խոսքով հանդես է գալիս որևէ պետական պաշտոնատար անձ, ընդ որում՝ հրապարակայնորեն:

Վերջերս Ազգային ժողովը քրեականացրեց բռնության քարոզն ու ատելության խոսքը եւ այդ համատեքստում հանրային խորհրդի նախագահի կողմից նման բառապաշարի օգտագործումը արդյոք չպետք է արժանանա իրավասու մարմինների գնահատականին՝ Ֆանյանը կարծիք հայտնեց, որ յուրաքանչյուր նման դեպքին, նման ստահոդ տեղեկատվության տարածմանը պետք է օրենքով սահմանված ընթացակարգով արձագանք տրվի:

«Քանի որ միշտ նման մերկապարանոց հայտարարություններ արել են և անպատիժ են մնացել, դրա համար էլ ինչ ուզում են՝ իրենց էջերում գրում են, ընդ որում՝ ոչ վայել, ոչ կոռեկտ և նույնիսկ սանձարձակության հասնող ոճով: Ինչու ոչ, այո, պետք է ընթացք տրվի: Եթե զրպարտության խնդիր է, պետք է հայց հարուցվի: Իհարկե, դա պետք է հասցեատերը որոշի: Եթե սուտ մատնության խնդիր է, թող իրավապահները զբաղվեն դրանով: Յուրաքանչյուր ասված խոսք պետք է ունենա իր հետևանքը: Թե չէ առավոտից երեկո ով ինչ ուզի իր էջում կխոսի, կգրի»,- նշեց Ֆանյանը:

Հեղինակ՝ Իզաբել Սահակյան

Աղբյուր` Փաստինֆո