Փաստ ինֆո

Մենք մեր մասին, մեր պատմությունը պատմեցինք շատ ուժեղ, լսելի, տեսանելի ոգեկոչեցինք, բայց առանց ողբի: Ինքներս մեզ նայեցինք այլ տեսակետից, և մեր այդ կերպարը, համոզված եմ, բոլորիս շատ դուր եկավ, որովհետև մենք հասկացանք, որ ահա այսպիսի ազգ ենք, այսպիսի ժողովուրդ ենք: Ֆեյսբուքյան այսօրվա ուղիղ եթերում ասել է ՀՀ վարչապետ Նիկոլ Փաշինյանը՝ անդրադառնալով ապրիլի 24-ին տեղի ունեցած միջոցառումներին:

«Շատերը սոցցանցերում հարց էին բարձրացնում, թե ինչպե՞ս կարելի է ապրիլի 24-ին Ծիծեռնակաբերդ բարձրանալ արևածաղիկ չրթելով, շատերը բարձրացնում էին հարցը, որ փողոցների երկայնքով, գետնին թափված ծաղկի վաճառք է տեղի ունենում և այլն: Երբ ինքներս մեզ այլ տեսանկյունից նայեցինք, նայեցինք մեր մյուս կերպարին, այդ երկուսը համեմատեցինք և հարցեր բարձրացրինք, այսպիսով քաղաքակրթական նոր նշաձող սահմանեցինք»,-ասաց վարչապետը:
Նա պատմեց, որ երբ հայտարարել էին Ծիծեռնակաբերդ գնալ արգելքւ մասին, որ կսկիծով պետք է փակել դեպի Մեծ Եղեռնի հուշահամալիր տանող ճանապարհները, շատ կանխատեսելի շրջանակներից շատ կոնկրետ մեկնաբանություններ եղան, թե ապագզային, պրոթուրքական իշխանությունը հատուկ փակում է Ծիծեռնակաբերդը, որպեսզի մոռացության մատնի Ցեղասպանության պատմությունը:

«Մենք ցույց տվեցինք ազգայինի մեր ընկալումն ու, այո, դա հակադրեցինք հին ընկալումներին, որոնք ես անվանում եմ ատկատային ընկալումներ, քանի որ ոմանք չեն խորշել ազգային միջոցառումների տակ որոշակի ատկատներ ապահովել»,-ասաց Փաշինյանը:

Նա նշեց նաև, որ հաջորդ տարիներին, երբ Ծիծեռնակաբերդի ավանդական երթը կրկին տեղի ունենա, այս տարվա փորձն անպայման կօգտագործվի, որպեսզի միջոցառումներն ավելի տպավորիչ լինեն։
«Մենք կարողացանք ոչ միայն սևերես չլինել աշխարհի առաջ, այլև կարողացանք քաղաքակրթության նոր նշաձող սահմանել ու գործնականում արձանագրեցինք, թե ինչ է նշանակում» ճգնաժամը՝ որպես հնարավորություն» նախադասությունը»,– շեշտեց Փաշինյանը։
Մանրամասները` տեսանյութում:

Աղբյուր` Փաստինֆո