Փաստ ինֆո

Ընդունելության քննությունների համար ընտրել ենք օպտիմալ տարբերակը, որպեսզի և կարողանանք մեր դիմորդների գիտելիքը ստուգել, և՛ համավարակային միջոցառումներին չխոչնդոտենք: Այս մասին այսօր ֆեյսբուքյան ուղիղ եթերում ասաց ՀՀ Կրթության, գիտության, մշակույթի և սպորտի նախարար Արայիկ Հարությունյանը:

Նա հայտնեց, որ սույն թվականի մայիսի 25-ից մինչև հունիսի 15-ը դիմորդներին հնարավորություն կտրվի հայտավորվել, որի ժամանակ կընտրեն նաեւ քննական առարկան, բուհը և մասնագիտությունը:

«Մինչև մարտի 15-ը մի քանի քննության համար հայտավորված դիմորդներին կվերադարձվեն քննությունների համար վճարված գումարները փոխանցման միջոցով: Այսինքն` մենք մի քննություն ենք հանձնելու: Առաջարկներ ստացել ենք բուհերից, բայց դրանք դեռ քննարկման ենթակա են, վերջնական չեն, և մինչև ամսի 30-ը կասենք, թե որ մասնագիտությունից որն է լինելու միակ և հիմնական քննության առարկան»,-ասաց Հարությունյանը:

Նա շեշտեց, որ նախարարությունը ցանկանում է ոչ միայն ատեստատներով ընդունելություն լինի, այլև անպայման գիտելիքի ստուգում լինի և այդ պատճառով էլ որոշվել է մեկ քննություն իրականացնել անվտանգության բոլոր պայմաններին համապատասխան:

«Քննական կենտրոնները լինելու են ամբողջ հանրապետության տարածքում և մենք այդ քննությունները կիրականացնենք ոչ զանգվածային կերպով, այսինքն` սահմանափակ դիմորդներ կլինեն տարածքում ու նրանք պարտադիր դիմակներ, ախտահանման միջոցներ կունենան»,-շեշտեց ԿԳՄՍ նախարարը ու տեղեկացրեց, որ դիմորդները քննությունները կհանձնեն հուլիսի սկզբին՝ առաջին տասնամյակի ընթացքում:

Կրթության, գիտության, մշակույթի և սպորտի նախարարի տեղակալ Ժաննա Անդրեասյանն էլ ավելացրեց, որ հայտերի ընդունումն իրականացվելու է էլեկտրոնային եղանակով:

Աղբյուր` Փաստինֆո