Փաստ ինֆո

Աշխատանքային իրավունքները կարևորագույն ոլորտ են , որտեղ խնդիրներ կան: Առաջնահերթ խնդիրն իրազեկման պակասն ու արտադատական մարմնի բացակայությունն է: Այս մասին այսօր Մարդու իրավունքների պաշտպանության մշտական հանձնաժողովի նիստի ժամանակ ասաց ՀՀ Մարդու իրավունքների պաշտպան Արման Թաթոյանը:

«Չկա օրենսդրության նկատմամբ վերահսկողություն իրականացնող արտադատական մարմին, միակ արդյունավետ եղանակը դատարանն է, բայց դա է չակերտներում է արդյունավետ ստացվում, որովհետև երկար ժամանակ մարդիկ ընկնում են քաշքշուկների մեջ: Հաճախ մարդը չի էլ դիմում դատարան, դիմի ի՞նչ անի, ընկնի քաշքշուկների մե՞ջ»,-ասաց Թաթոյանը:

Նա տեղեկացրեց, որ Սահմանադրական դատարան դիմում է հասցեագրել ու ողջամիտ ժամկետի խնդրի հետ կապված հարցեր է բարձրացրել, քանի որ տարիներով դատական գործերի ձգձգումից քաղաքացիները միայն տուժում են:

«Դատավորի համար ոչ մի հետևանք չի առաջանում: Ես այդ հարցը բարձրացրել եմ, ինչու՞ պետք է դատավորի համար ոչ մի հետևանք չառաջանա , եթե նա տարիներով ձգում է գործը»,-շեշտեց ՄԻՊ-ը:

Նրա խոսքով, աշխատանքային իրավունքների հիմնական խախտումներն են՝ գործատուները աշխատանքից ազատվող աշխատակիցների վերջնահաշվարկ չեն կատարում,աշխատավարձերից անհիմն պահումներ են անում, պատշաճ ծանուցումներ չեն անում, առանց աշխատողների համաձայնության նրանց այլ աշխատանքի են փոխադրում և այլն:

Աղբյուր` Փաստինֆո