Փաստ ինֆո

Պարոն Մարուքյանի հայտարարությունը պոպուլիստական է: Այն որևէ տնտեսական տրամաբանություն, սոցիալական հասցեականություն չունի, քանի որ մեկ ամսվա կտրվածքով չէ, որ պետք է լուծենք մեր հանրության խնդիրները: «Փաստինֆո»-ի հետ զրույցում այս մասին ասաց ՀՅԴ բյուրոյի տնտեսական հետազոտությունների գրասենյակի պատասխանատու, տնտեսագետ Սուրեն Պարսյանը անդրադառնալով ԱԺ «Լուսավոր Հայաստան» խմբակցության ղեկավար Էդմոն Մարուքյանի հայտարարությանը:

Նշենք, որ պատգամավորն այսօր ֆեյսբուքյան ուղիղ եթերի ժամանակ նշել էր, որ առաջարկում է մայիսի համար յուրաքանչյուր ընտանիքի հատկացնել 100 հազար դրամ, իսկ յուրաքանչյուր թոշակառուի տալ հավելյալ մեկ ամսվա թոշակ:

«Ենթադրենք այդ 100 հազարները տվեցին, մարդիկ այդ գումարները սպառեցին, վերջացրեցին բա հետո հունիս, հուլիս ու մյուս ամիսներին ինչ են անելու: Այս տարի մենք ճգնաժամի մեջ ենք գտնվելու և այդ գումարները պետք է հասցեական օգտագործվեն, ոչ թե բոլորին անխտիր: Իսկ այդ մոդելը սոցիալական հասցեականություն չունի, զուտ պոպուլիստական է»,-ասաց տնտեսագետը:

Հարցին որքանով են պետական աջակցության ծրագրերը հասցեական, Սուրեն Պարսյանը նկատեց, որ դրանք մեծ հասցեականություն չունեն և դրանց մի մասը զուտ իմիտացիա է ստեղծում, որ օգնություն են տրամադրում. «Լավագույն օրինակը կոմունալներն էին, որ հանրային բողոքի տակ վերանայեցին և հաջորդ փաթեթը բերեցին: Իմիտացիոն ծրագրեր են, երբ կառավարությունը զբոսաշրջության ոլորտին պատրաստվում է մինչև 50մլն դրամի վարկ տրամադրել: Ենթադրենք այդ վարկը տրամադրվեց, զբոսաշրջային ընկերությունն ինչ է անելու դրա հետ: Բնականաբար նոր բիզնես ծրագիր չի իրականացնելու, որովհետև պահանջարկ չկա, և ինքն այս գումարն օգտագործելու է անձնական կարիքների համար: Կամ վարկ են տրամադրում, որ հարկերը փակեն, որ չաշխատողների աշխատավարձը վճարեն: Անարդյունավետ և բիզնես տրամաբանությունից զուրկ մոտեցումներ են»,-ասաց Սուրեն Պարսյանը:

Վերջինս ընդգծեց` պետությունը մարդկանց պետք է ապահովի նվազագույն պարենով: Կարևոր է, որ մարդիկ սոված չմնան, հետևաբար եկամուտով պետք է ապահովել այն ընտանիքներին, որոնք այս ընթացքում եկամտի աղբյուր չունեն. «Պարոն Մարուքյանի ասած 500 հազար ընտանիքներից մի մասը նպաստառու է, մի մասը տարբեր պետական ծրագրերից գումարներ են ստանում: Այսինքն` այդ մարդուն նորից գումար տալու իմաստը որն է: Մենք պետք է գումար տանք նրանց, ովքեր օգնություն չեն ստացել և դրա կարիքն ունեն: Դա լուրջ աշխատանք է և պետք է հասցեականություն ապահովեն, բայց կարևոր է, որ մարդկանց նաև այս իրավիճակում որոշակի միջոցներ տրամադրեն գումար աշխատելու համար: Այսինքն` փորձենք մարդկանց կարթ տալ, ձուկ տալու փոխարեն: Գյուղացուն չպետք է փող տանք, որ այդ գումարը ծախսի ենթադրենք պարենի համար: Պետք է փող տանք, որ հող մշակի, հակառակ դեպքում այդ փողը կուտի, կվերջացնի, հողն էլ կմնա»,-ասաց տնտեսագետը:

Աղբյուր` Փաստինֆո