Փաստ ինֆո

Համաշխարհային փորձը ցույց է տալիս, որ ցեղասպանությունները որպես կանոն երկու հիմնական պատճառ են ունենում, որոնցից մեկը պետության և պետական համակարգի բացակայությունն է, իսկ երկրորդը պետության անարդյունավետ լինելը, այսինքն պետությունը կա, բայց դրա ինստիտուտներն այնքան քայքայված են, որ այս կամ այն հանրույթն անխուսափելիորեն կանգնում է բնաջնջման սպառնալիքի առաջ: Այս մասին այսօր Հայոց Ցեղասպանության 105-րդ տարելիցին նվիրված տեսաուղերձում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

Նա շեշտեց, որ Ցեղասպանության կանխարգելման առաջնային միջոցը պետություն ունենալն է, իսկ երկրորդը՝ պետության արդյունավետ լինելը:

«Ասվածի համատեքստում արժե նկատել, որ այս ուղղությամբ հայ ազգն արդեն արել է իր առաջին քայլը: Անկախ պետականության վերականգնումն ու Արցախյան գոյամարտն առաջին հերթին հավանական ցեղասպանությունը կանխարգելող նշանակություն ունեն: Եթե չլիներ Հայաստանի Հանրապետությունը, ապա տրամաբանական է, որ ինչպես Արցախում, այնպես էլ Հայաստանում հայությունը կկանգներ վերստին ցեղասպանվելու սպառնալիքի առաջ»,-ասաց Մարուքյանն ու ընդգծեց, որ այս մոտեցումն ընկած է նաև Արցախյան հակամարտության հիմում ու հենց դրանով է հիմնավորվում, որ Արցախի անվտանգության ապահովումն ու երաշխավորումը ՀՀ-ի, հայության համար ամենակարևոր խնդիրն է:

ԼՀԿ ղեկավարն արձանագրեց, որ Հայոց Ցեղասպանության արդյունքում հայ ազգը կորցրել է ուժի, մարդկային և նյութական ռեսուրսների գերակշռող մասը, սակայն այս փաստը չպետք է թուլացնի և ընկճի մեզ:

«Այդ աղետից հետ մենք՝ որպես հավաքականություն, պետք է շատ ավելի կազմակերպված և հզոր լինենք, գիտակցենք, որ ապրում ենք ոչ միայն ինքներս մեզ համար, այլև բոլոր այն մարդկանց փոխարեն, որոնք զոհվեցին, այո, մենք ապրում ու հզոր Հայաստա ենք ստեղծում նաև 1,5 մլն հայերի համար, և հենց սա է մեր լինելիության մեծագույն խորհուրդն ու առաքելությունը»,-շեշտեց Մարուքյանը:

Մանրամասները՝ տեսանյութում:

Աղբյուր` Փաստինֆո