Փաստ ինֆո

Օսմանյան Թուրքիայի երկար տարիների հայատյաց քաղաքականությունը 1915 թվականին երիտթուրքերի կառավարության օրոք հասավ գագաթնակետին: Ծիծեռնակաբերդում Հայոց ցեղասպանության 105-րդ տարելիցի կապակցությամբ իր ուղերձում ասաց ՀՀ վարչապետ Նիկոլ Փաշինյանը:

«Տարիներ տևած և պետական որոշմամբ իրականացված ցեղասպանության հետևանքով Արևմտյան Հայաստանն ամբողջությամբ հայաթափվեց: 1.5 մլն մեր հայրենակիցներ սպանվեցին, հարյուր հազարավոր հայեր դարձան գաղթական զրկվելով իրենց պատմական հայրենիքում ապրելու իրավունքից: Մեծ եղեռնի հետևանքով հայ ժողովուրդը ոչ միայն ահռելի մարդկային կորուստներ կրեց, այլև ենթարկվեց հայրենազրկման և մշակութային ջարդի: Անդառնալի են մեր ժողովրդի հոգևոր և կրոնական ժառանգության կորուստները: Հսկայական էին նրա նյութական վնասները: Օսմանյան կայսրության իշխանությունների իրականացրած Հայոց ցեղասպանությունը ոչ միայն մեր ժողովրդի ինքնության, այլև ողջ մարդկային քաղաքակրթության դեմ ուղղված հանցագործություն էր: 1915 թվականի ապրիլի 24-ը դրաձավ այս ողջ գործընթացի ամենաուժեղ խորհրդանիշը, որովհետև այդ օրը հարյուրավոր հայ մտավորականներ, կրոնական ու քաղաքական գործիչներ երիտթուրքերի կառավարության հրամանով ձերբակալվեցին, աքսորվեցին, սպանվեցին կամ անհետ կորան»,-ասաց վարչապետը:

Հայոց ցեղասպանությունը պաշտոնապես ճանաչել է աշխարհի 30 երկիր և վարչապետը նշեց, որ երախտապարտ ենք բոլոր այն պետություններին, միջազգային կառույցներին, հոգևոր և աշխարհիկ առաջնորդներին, ովքեր իրենց համերաշխությունն են հայտնում հայ ժողովրդին, ճանաչում և դատապարտում են Հայոց ցեղասպանությունը. «Ինչու մեկ դար անց չեն մարում մեր զգացմունքները, իսկ մեր սրտերում էլ ավելի վառ է այրվում հիշատակի ճրագը: Պատասխանը պարզ է. Անցել է մեկ դարից ավելի, սակայն չեն վերացված Ցեղասպանության հետևանքները: Առ այսօր Թուրքիան կատարվածի համար որևէ զղջում չի հայտնել, ներողություն չի հայցել, դա է պատճառը, որ մենք այսօր հայտարարում ենք` հիշում ենք և պահանջում: Հայոց ցեղասպանության ճանաչումը համարում ենք ոչ միայն մեր ազգային, այլև համամարդկային օրակարգի հարց, որովհետև ապրիլի 24-ը ոչ միայն մեր անմեղ զոհերի խնկարկման օր է, այլև մարդկության դեմ ուղղված ծանրագույն հանցագործության»,-նշեց Նիկոլ Փաշինյանը:

Աղբյուր` Փաստինֆո