Փաստ ինֆո

Հայոց ցեղասպանության ճանաչման ողջ գործընթացը կարելի է բաժանել երկու շրջանի մինչև 100-րդ տարելիցը և դրանից հետո: Ցեղասպանության 100-րդ տարելիցից հետո Թուրքիայի դիրքորոշումը կոշտացավ: «Փաստինֆո»-ի հետ զրույցում այս մասին ասաց թուրքագետ Անդրանիկ Իսպիրյանը:

Վերջինս նկատեց` նախորդ տարի որոշակի քաղաքների, նահանգների մակարդակով տեղի ունեցան ճանաչման գործողություններ, որոնք Թուրքիային այդքան «չկատաղեցրեցին», որքան ԱՄՆ-ի Կոնգրեսի երկու պալատների Հայոց ցեղասպանության ճանաչման բանաձևերը. «Ցավոք սրտի սա կապված էր ԱՄՆ-Թուրքիա լարված հարաբերությունների հետ, սակայն հայկական կողմը նույնպես իր ներդրումն ուներ այս ամենի մեջ: Ի վերջո հայկական կողմի երկար տարիների աշխատանքի արդյունքում է, որ Հայոց ցեղասպանության հարցը դարձավ այնպիսի մի «գործիք», որը գերտերություններն արդեն կարող են օգտագործել Թուրքիայի դեմ որպես ճնշում: Ցավոք շատերը ոչ միայն բարոյական, այլև իրենց քաղաքական շահերից ելնելով են օգտագործում այն Թուրքիայի վրա, թեև այս պարագայում որքան էլ հասկանանք իրականությունը, ողջունում ենք գործընթացը, քանի որ ի վերջո դա ճշմարտությունն է: Որքան էլ Ամերիկան ինչ-ինչ նպատակներով կամ քաղաքական հաշվարկներով դա արդեց, ամեն դեպքում սենատորների մեծ մասը դա սրտանց արեց անկախ հրահանգից»,-նշեց թուրքագետը` ընդգծելով, որ Թուրքիան հասկացավ` թեև 100-րդ տարելիցն անցել է, բայց հարցը, միևնույն է, չի լուծվել:

Անդրանիկ Իսպիրյանը նշեց, որ Թուրքիայի նախագահականում հենց դրա հետ կապված երեք ամիս առաջ հատուկ նիստ է տեղի ունեցել և որոշում է կայացվել հայոց ցեղասպանության ճանաչման դեմ պայքարի նոր ռազմավարություն մշակելու: Եթե մինչև 2015 թվականը Թուրքիան փորձում էր տարբեր մեթոդներով դիմակայել աշխարհին, ապա դրանից հետո Թուրքիայի դիրքորոշումն արդեն կոշտացել է. «Եթե նախկինում Ստամբուլի կենտրոնում կարելի էր Հայոց ցեղասպանության զոհերի հիշատակին նվիրված միջոցառում իրականացնել, ապա 2015 թվականից հետո դա արգելվեց: Նախորդ տարի հենց ապրիլի 24-ին Ստամբուլում էի: Իսլամական արվեստի թանգարան կա, որտեղ ի սկզբանե հավաքել էին հայ մտավորականներին, գրողներին և այնուհետև այնտեղից տարել, այնտեղ նախկինում հավաքվում էին հայերը, թուրք ակտիվիստները և բոլոր նրանք, ովքեր դատապարտում են ցեղասպանությունը, հանդես էին գալիս հայտարարությամբ, սգում, բայց նախորդ տարի ոստիկանությունն ուղղակի թույլ չտվեց: Այն, ինչ կար մինչև 2015 թվականը այլ էր, դրանից հետո Թուրքիայի դիրքորոշումը փոխվել է, հետ են վերադառնում հին, խիստ ժխտողական քաղաքականությանը»,-ընդգծեց թուրքագետը:

Աղբյուր` Փաստինֆո