Փաստ ինֆո

Վերաքննիչ քրեական դատարանը՝ նախագահությամբ դատավոր Ալեքսանդր Ազարյանի, վերացրել է խոշոր չափերով հարկեր չվճարելու մեջ մեղադրվող ձեռներեցի նկատմամբ որպես խափանման միջոց ընտրված կալանավորումը՝ հիմնավոր կասկածի բացակայության հիմքով։ Այս մասին «Փաստինֆո»-ի հետ զրույցում ասաց նրա պաշտպան Գոռ Միքայելյանը:

Նախաքննության վարկածով՝ ձեռներեցը ՀՀ ոստիկանությանը պետհամարանիշերի հաշվառման համարանիշեր մատակարարած ընկերության բաժնետերերից մեկը հանդիսացող արտասահմանյան ընկերությունից իր ղեկավարած երկու ընկերությունների անվամբ 2011թ.–ից 2019թ. ապրիլ ամիսն ընկած ժամանակահատվածում պարբերաբար ստացել է ընդհանուր շուրջ 3,3 միլիոն ԱՄՆ դոլար գումար, որը չի արտացոլել օրենքով սահմանված հաշվետվություններում և հարկման հիմք հանդիսացող պարտադիր այլ փաստաթղթերում: Այդպիսով ենթադրաբար խուսափել է առանձնապես խոշոր չափերի՝ 731 241 054 ՀՀ դրամի հարկեր /տույժ-տուգանքով՝ 1 528 073 858 ՀՀ դրամ/ պետբյուջե վճարելուց: Նախաքննական մարմինը ձեռներեցին մեղադրանք է առաջադրել ՀՀ քրեական օրենսգրքի 205-րդ հոդվածի 2-րդ մասով:

Փաստաբանի խոսքով՝ նման հոդվածով մեղադրանքի առաջադրումն այնքան աբսուրդ էր, որ նույնիսկ մտածել էլ չէին կարող, որ կարելի է նման մեղադրանք մտածել:

«Երբ առաջադրեցին մեղադրանքը, անմիջապես ասացին, որ կալանքի միջնորդություն են ներկայացնելու դատարան: Միանգամից ասացի, որ միայն դատավոր Մարտիրոսյանը կարող է նման մեղադրանքով կալանավորել մարդուն: Մոտ երկու ժամ անց պարզվեց, որ միջնորդությունը հենց դատավոր Մարտիրոսյանն է քննելու: Բնականաբար միջնորդությունը բավարարվեց հենց այն հիմքերով, ինչ քննիչն էր ներկայացրել, այսինքն՝ դատարանը փաստեց, որ առկա են հիմնավոր կասկածը, թաքնվելու և քննությանը խոչընդոտելու հիմքերը»,- նշեց Միքայելյանը:

Կալանավորման մասին դատարանի որոշման դեմ փաստաբանը վերաքննիչ բողոք է ներկայացրել, ինչը բավարարվել է:

Միքայելյանը նշեց, որ Վերաքննիչ դատարանը հաստատել է, որ ոչ հիմնավոր կասկած կա, ոչ էլ՝ թաքնվելու և քննությանը խոչըդոտելու հավանականություն:

Ըստ Միքայելյանի՝ կալանավորման ապօրինությունն այնքան ակնհայտ էր, որ Վերաքննիչ դատարանն անդրադարձել է ոչ միայն հիմնավոր կասկածին, այլև՝ կալանավորման հիմքերին, ինչն աննախադեպ էր, քանի որ հիմնավոր կասկածը բացառելու դեպքում դատարաններն այլ հիմքերին չեն անդրադառնում:

Անդրադառնալով առաջադրված մեղադրանքի էությանը՝ փաստաբանն ասաց, որ այդքան գումար ստանալու ապացույցներ չկան, իսկ լինելու դեպքում էլ, հարկ չէր կարող առաջանալ այդ գումարից, այն էլ՝ այդքան: Չմանրամասնելով գործի հանգամանքները՝ Միքայելյանը նշեց, որ Առաջին ատյանի դատարանում ևս հիմնավորել են, որ այդ գումարները հարկման ենթակա չէին:

Հեղինակ՝ Իզաբել Սահակյան

Աղբյուր` Փաստինֆո