Փաստ ինֆո

ԱԺ նախկին պատգամավոր Արթուր Գևորգյանի փաստաբանը միջնորդություն է ներկայացրել՝ պահանջելով վերացնել Արթուր Գևորգյանին որպես մեղադրյալ ներգրավելու մասին որոշումը, հանցակազմի սուբյեկտիվ և օբյեկտիվ կողմերի բացակայության հիմքով դադարեցնել քրեական հետապնդումը և կարճել գործի վարույթը: Այս մասին «Փաստինֆո»-ի հետ զրույցում ասաց փաստաբան Հրանտ Անանյանը:

Նրա փոխանցմամբ՝ միջնորդություններ են ներկայացվել նաև Արթուր Գևորգյանի նկատմամբ հետախուզում հայտարարելու մասին որոշումը վերացնելու մասին՝ այն առանց բավարար և պատշաճ հիմքերի կայացված լինելու հիմքով և կալանավորումը որպես խափանման միջոց ընտրելու մասին որոշումը վերացնելու մասին՝ թե կասկածի անհիմն լինելու, թե՛ կալանավորման հիմքերի բացակայության պատճառով:

Պաշտպանության կողմը հանգել է հետևության, որ նախկին պատգամավորին որպես մեղադրյալ ներգրավելու, հետախուզում հայտարարելու, խափանման միջոց ընտրելու գործընթացը պատշաճ փաստարկված չէ, իսկ սահմանափակ փաստական տվյալներն էլ գնահատվել են յուրովի, որի արդյունքում նախաքննության մարմինը սխալ իրավական գնահատական է տվել ապացուցման առարկան կազմող փաստերին։ Փաստաբանի դիտարկմամբ՝ «ամեն ինչ» ի վնաս Արթուր Գևորգյանի է մեկնաբանվել առ այն, թե, իբր, Գևորգյանի գտնվելու վայրը հայտնի չէ եւ նա թաքնվում է քննությունից:

Անդրադառնալով առաջադրված մեղադրանքին՝ փաստաբանը նշել է, որ Գևորգյանին վերագրվող մեղադրանքի միակ առանցքը կազմում է 2019թ հունվարի 10-ին Արթուր Գևորգյանի կողմից 739.625.000 ՀՀ դրամին համարժեք 1.525.000 ԱՄՆ դոլարով ԱՄՆ-ի Գլենդել քաղաքի 1426 Մերրիման Դր հասցեում առանձնատուն ձեռք բերելու փաստը: Պաշտպանական կողմը, չի հերքում, որ ԱՄՆ-ի Գլենդել քաղաքի 1426 Մերրիման ԴՐ հասցեում գտնվող առանձնատունը պատկանում է Արթուր Գևորգյանին, բայց բողոք-միջնորդության մեջ անդրադարձել է Գևորգյանի կողմից դրա ձեռքբերման և դրա համար վճարման ամսաթվին:

Այն է՝ Արթուր Գևորգյանն այդ գույքը ձեռք է բերել ոչ թե 2019 թվականի հունվարի 10-ին, երբ դեռևս հայտարարատու պաշտոնյա էր, այլ 2019 թվականի մարտի 6-ին՝ իր պաշտոնը թողնելուց ավելի քան մեկ ամիս անց, ու չէր հանդիսանում ՀՀ Բարձրաստիճան պաշտոնատար անձանց էթիկայի հանձնաժողովին հայտարարագիր ներկայացնելու պարտավորություն ունեցող անձ:

Ավելի վաղ տեղեկացրել ենք, որ ԱԺ նախկին պատգամավոր Արթուր Գևորգյանը որպես մեղադրյալ է ներգրավվել ՀՀ քրեական օրենսգրքի 314.1-րդ հոդվածի 2-դ մասով և 310.1 հոդվածի 1-ին մասով նախատեսված հանցավոր արարքներն առերևույթ կատարելու համար: Նրա նկատմամբ որպես խափանման միջոց է ընտրվել կալանավորումը: Այժմ Արթուր Գևորգյանը գտնվում է հետախուզման մեջ: Ըստ Դատախազության հաղորդագրության՝ ԱԺ նախկին պատգամավորը ՀՀ բարձրաստիճան պաշտոնատար անձանց էթիկայի հանձնաժողով ներկայացրած իր՝ 2018թ. գույքի, եկամուտների և փոխկապակցված անձանց, ինչպես նաև 2019թ. հունվարի 14-ին պաշտոնից ազատվելուց հետո պաշտոնական պարտականությունները դադարեցնելու օրվա դրությամբ առկա գույքի, եկամուտների և փոխկապակցված անձանց վերաբերյալ հայտարարագրում անփոփոխ հայտարարագրել է 50մլն ՀՀ դրամ, 1.6մլն ԱՄՆ դոլար և 150.000 Եվրո:

Մինչդեռ 2019թ. հունվարի 10-ին նա 1.525.000ԱՄՆ դոլարով, որի մի մասը՝ վարկային միջոցներով, ԱՄՆ-ում՝ մասնավորապես Գլենդելում, ձեռք է բերել առանձնատուն, ինչի մասին հայտարարագրման ենթակա տվյալը թաքցրել է 2019թ. հունվարի 14-ին պաշտոնից ազատվելուց հետո պաշտոնական պարտականությունները դադարեցնելու օրվա դրությամբ առկա գույքի, եկամուտների և փոխկապակցված անձանց վերաբերյալ ՀՀ բարձրաստիճան պաշտոնատար անձանց էթիկայի հանձնաժողով ներկայացրած իր հայտարարագրում:

Այսինքն Ա.Գեւորգյանը չի հայտարարագրել 1մլն ՀՀ դրամը գերազանցող հիշյալ անշարժ գույքը և հաշվետու ժամանակահատվածում ապօրինի հարստացել է, քանի որ 2019թ. հունվարի 10-ին ԱՄՆ-ում հիշյալ առանձնատան ձեռք բերումով նրա գույքի ավելացումն էականորեն գերազանցել է նրա՝ վերը նշված հայտարարագրերում արտացոլված օրինական եկամուտները և ողջամտորեն չի հիմնավորվում դրանցով:

Հեղինակ՝ Իզաբել Սահակյան

Աղբյուր` Փաստինֆո