Փաստ ինֆո

«Փաստինֆո»-ն բազմաթիվ ահազանգեր է ստացել քաղաքացիներից, որ մայրաքաղաքի կենտրոնական փողոցները մնացել են քանդված։ 

Մայրաքաղաքի ծայրամասերի վարչական շրջաններում կարկատաններով, մեղմ անձրեւի տակ իրականացրել են ասֆալտապատման աշխատանքներ, իսկ կենտրոնական հատվածներում աշխատանքները մնացել են կիսատ։ Մասնավորապես՝ Հաղթանակ կամրջի վրա ասֆալտը քանդել են ու տեղումների ուժգնանալու պատճառով կիսատ թողել։

Խնդրի վերաբերյալ «Փաստինֆո»-ն զրուցեց Երևանի ավագանու «Լույս» խմբակցության անդամ Անի Խաչատրյանի հետ: Խաչատրյանն ասաց, որ ինքն անձամբ անձրևի ժամանակ ասֆալտապատման աշխատանքների ականատես չի եղել, սակայն եթե նման բան կա, ապա դա լուրջ խնդիր է և ավելի լավ այդ աշխատանքը չիրականացվեր:

«Մի օգտատեր լուսանկար էր տեղադրել խնդրի վերաբերյալ և Շինարարության և բարեկարգման վարչություն պետ Գրիգոր Հարությունյանը նշել էր, որ ասֆալտապատման աշխատանքները մինչև անձրևի գալն են իրականացվել և անձրևի ժամանակ դադարեցվել են: Սակայն եթե այս աշխատանքները շարունակվում են անձրևի ժամանակ, դա արդեն խնդիր է ու մենք ոչ մի արդյունք չենք ունենալու, ավելի լավ էր չանինք այդ ասֆալտապատումը»,-ասաց «Լույս» խմբակցության անդամը:

Նա շեշտեց, որ նախկինի հետ համեմատած քաղաքապետարանի աշխանտանքներում շատ բան չի փոխվել, միայն, ինչպես իշխանություններն են ասում, կոռուպցիոն մասն է պակասել, սակայն դա էլ փաստերով դեռ տեսանելի չէ:

«Թե՛ բյուջեին, թե՛ զարգացման ծրագրին նայելով հասկանում ենք, որ ոչինչ չի փոխվել, էլ չասեմ անցած տարվա ներկայացված կատարողականը: Հիմա եթե մենք ուզում ենք ցույց տալ, որ տեսեք-տեսեք ասֆալտապատում ենք անում, բայց դա անձրևին ենք անում՝ արդյունքը մի որոշ ժամանակ հետո զրոյական է լինելու, ճանապարհը նորից քանդվելու է: Այս կերպ մենք անիմաստ գումար ենք ծախսում: Երևի խոսքը պոպուլիստական քայլի մասին է՝ ցույց տանք, որ արել ենք, բայց արդյունքը կարևոր չէ»,-ասաց Անի Խաչատրյանը:

Աղբյուր` Փաստինֆո