Փաստ ինֆո

ՀՀ կառավարությունն այսօրվա նիստում հաստատեց «Արտակարգ դրության իրավական ռեժիմի մասին» օրենքում փոփոխություններ անելու մասին որոշումը: Նշենք, որ որոշումը հաստատվեց չզեկուցվող ընթացակարգով:

Որոշման հիմնավորման մեջ նշված է, որ նոր կորոնավիրուսային հիվանդության դեմ պայքարի շրջանակներում հայտարարված արտակարգ դրության իրավական ռեժիմի գործողության պայմաններում մի շարք դեպքերում իրավիճակին օպերատիվ և արդյունավետ արձագանքելու անհրաժեշտություն է առաջանում, ինչը ենթադրում է իրավունքների և ազատությունների սահմանափակման և արտակարգ դրության իրավական ռեժիմով պայմանավորված միջոցառումների կիրառման առավել հստակ և իրավիճակային դեպքերի սահմանում:

«Գործող օրենքով հստակեցման կարիք ունի համաճարակի հետևանքով առաջացած արտակարգ դրության դեպքում համաճարակի կանխման նպատակով անձանց անձնական ազատության իրավունքների սահմանափակման հնարավորությունը: Անհրաժեշտ է հստակեցնել պարետի և պարետատան կարգավիճակը, ինչպես նաև պարետի կողմից ընդունվող ակտերի կարգավիճակը»,-նշված է որոշման հիմնավորման մեջ:

Նախատեսվում է օրենքի 11-րդ հոդվածը լրացնել նոր 4-րդ և 5-րդ մասերով. «4. Համաճարակի հետևանքով առաջացած արտակարգ իրավիճակի հիմքով հայտարարված արտակարգ դրության դեպքում անձի անձնական ազատության իրավունքը կարող է սահմանափակվել արտակարգ դրության պայմաններում կիրառվող միջոցառումների իրականացման համար ներգրավված մարմինների կողմից տրված բանավոր կամ արտակարգ դրություն հայտարարելու մասին Հայաստանի Հանրապետության կառավարության որոշմամբ սահմանված դեպքերում գրավոր կարգադրությամբ: Սույն մասով սահմանված դեպքում անձնական ազատության սահմանափակման ենթարկված յուրաքանչյուր անձ իրեն հասկանալի լեզվով անհապաղ տեղեկացվում է անձնական ազատության իրավունքի սահմանափակման պատճառների մասին և կարող է պահանջել, որ սահմանափակման մասին անհապաղ տեղեկացվի իր ընտրած անձը։

5. Արտակարգ դրություն հայտարարելու հիմք հանդիսացած հանգամանքների արդյունքում առաջացած սոցիալական խնդիրների և տնտեսական հետևանքների հակազդման նպատակով Հայաստանի Հանրապետության կառավարության կողմից կարող են սահմանվել ֆիզիկական և իրավաբանական անձանց աջակցությանն ուղղված միջոցառումներ»,-նշված է որոշման մեջ:

Իրավապաշտպան Ռուբեն Մելիքյանն այս նախագիծը որակել է որպես խայտառակություն՝ նշելով. «Սահմանում են ինչ-որ պետական մարմնի ԲԱՆԱՎՈՐ կարգադրության հիման վրա փաստացի ազատությունից զրկվելու հնարավորություն։ Ո՛չ փաստաբանի իրավունք, ո՛չ բողոքարկման գործուն մեխանիզմ»։

Աղբյուր` Փաստինֆո