Փաստ ինֆո

Բանավոր կարգադրության հիման վրա մարդուն ազատազրկելը միջնադար է և նման բան կարող էր լինել միայն մոնղոլների ոսկե հորդայում: Այս մասին «Փաստինֆո»-ի հետ զրույցում ասաց փաստաբան, «COVID-19 Հայաստան». փաստահավաք խմբի Տիգրան Աթանեսյանը՝ անդրադառնալով «Արտակարգ դրության իրավական ռեժիմի » մասին օրենքում փոփոխություններ կատարելու մասին նախագծին:

Աթանեսյանը փոփոխությունները որակեց որպես չմտածված,հակաիրավական և հակամարդկային:

«Ցավում եմ, որ մեր Կառավարությունը չի դիմում խելացի իրավաբանների օգնությանը՝ որևէ նախաձեռնության դեպքում»,- նշեց նա՝ արձանագրելով, որ Սահմանադրությունը թույլ է տալիս համաճարակի ժամանակ մարդկանց ազատազրկել բուժման նպատակներով, բայց դա սկզբունք է, իսկ ընթացակարգը, որը պետք է ապահովի մարդու պահման պայմանները, մարդու պահման ռեժիմը, ժամկետը, ինչպես նաև՝ բողոքարկման իրավունքը, նախագծում անտեսված են:

«Հետևաբար՝ մենք այստեղ գործ ունենք պարզապես խայտառակության հետ, անթույլատրելի երևույթի հետ: Ընդ որում՝ առանց նշելու, թե որ պաշտոնատար անձը, եսիմ ով կարող է բանավոր կարգադրել, որպեսզի մարդն ազատազրկվի: Մխիթար Գոշն անգամ գերեզմանում շուռ եկավ: նման բան չի կարելի, նման բան չի լինում բնության մեջ շատ վաղուց »,- ասաց Աթանեսյանը:

Նրա խոսքով՝ սա ցույց է տալիս Կառավարության վերաբերմունքն իրավագիտության նկատմամբ ու վկայում ՝ խելացի իրավաբանների հետ աշխատելու ցանկություն չունենալու մասին:
Ավելի վաղ հայտնել ենք, որ ՀՀ կառավարությունն այսօրվա նիստում հաստատեց «Արտակարգ դրության իրավական ռեժիմի մասին» օրենքում փոփոխություններ անելու մասին որոշումը՝ չզեկուցվող ընթացակարգով: Նախատեսվում է օրենքի 11-րդ հոդվածը լրացնել նոր 4-րդ և 5-րդ մասերով. «4. Համաճարակի հետևանքով առաջացած արտակարգ իրավիճակի հիմքով հայտարարված արտակարգ դրության դեպքում անձի անձնական ազատության իրավունքը կարող է սահմանափակվել արտակարգ դրության պայմաններում կիրառվող միջոցառումների իրականացման համար ներգրավված մարմինների կողմից տրված բանավոր կամ արտակարգ դրություն հայտարարելու մասին Հայաստանի Հանրապետության կառավարության որոշմամբ սահմանված դեպքերում գրավոր կարգադրությամբ: Սույն մասով սահմանված դեպքում անձնական ազատության սահմանափակման ենթարկված յուրաքանչյուր անձ իրեն հասկանալի լեզվով անհապաղ տեղեկացվում է անձնական ազատության իրավունքի սահմանափակման պատճառների մասին և կարող է պահանջել, որ սահմանափակման մասին անհապաղ տեղեկացվի իր ընտրած անձը։

5. Արտակարգ դրություն հայտարարելու հիմք հանդիսացած հանգամանքների արդյունքում առաջացած սոցիալական խնդիրների և տնտեսական հետևանքների հակազդման նպատակով Հայաստանի Հանրապետության կառավարության կողմից կարող են սահմանվել ֆիզիկական և իրավաբանական անձանց աջակցությանն ուղղված միջոցառումներ»:

Աղբյուր` Փաստինֆո