Փաստ ինֆո

Վատիկանում ՀՀ նախկին դեսպան Միքայել Մինասյանին մեղադրանք է առաջադրվել ապօրինի հարստացման և փողերի լվացման համար, վարույթն իրականացնող մարմինը Միքայել Մինասյանին կալանավորելու մասին միջնորդություն է ներկայացվել դատարան: Այս տեղեկությունը «Փաստինֆո»-ի հետ զրույցում հաստատեց Մինասյանի պաշտպան Ամրամ Մակինյանը:

«Առաջադրված մեղադրանքը վերջին երկու տարիներին իմ տեսած ամենաաբսուրդ մեղադրանքներից մեկն է: Աբսուրդ է այնքանով, որ այս գործով ապացույցներն ուղիղ փաստում են ոչ թե արարքի առկայության, այլ՝ իսպառ բացակայության մասին»,- ասաց Մակինյանը:

Պաշտպանը տեղեկացրեց, որ արդեն մեկ ամիս է, ինչ միջնորդություն է ներկայացրել հարցաքննել այն ընկերության աշխատակիցներին, որի հետ Միքայել Մինասյանը պայմանագիր էր ստորագրել՝ ծառայությունների մատուցման մասին եւ պատասխանատու է եղել նշված հայտարարագիրը կազմելու և լրացնելու համար:

«Բայց քննչական մարմինը շատ լավ հասկանում է, որ, երբ հարցաքննի այս քրեական գործն ընդհանրապես քար ու քանդ է լինելու և փորձում է մինչև կալանավորման դատարանի որոշումը չկատարել նշված քննչական գործողությունը: Մեկ ամիս է, ինչ այդ հարցը բարձրացրել ենք և քննիչին, և՛ դատախազին, բայց ձայն բարբառո հանապատի»,- ասաց Մակինյանը:

Նշենք, որ Էթիկայի հանձնաժողով ներկայացված հայտարարագրում տեխնիկական վրիպակ է եղել քանի որ հայտարարագրում նշված բաժնեմասի վաճառքի գինը և պարոն Մինասյանի կողմից ստորագրված բաժնեմասի վաճառքի պայմանագրում նշված վաճառքի գինն իրար չեն համապատասխանում, ինչը քննչական մարմնի կողմից որակվել է որպես ապօրինի հարստացում։

Նրա խոսքով՝ սա մի անհասկանալի քրեական պրոցես է և շատ ակնհայտ է, թե ինչ է կատարվում Միքայել Մինասյանի դեմ՝ նաև հաշվի առնելով այն ազդակները, թե ինչ հաճախականությամբ և ինչ մակարդակներով է արծարծվել Միքայել Մինասյանի անունը:

«Քրեական մեղադրանք չկա, իսկ անձը մեղադրվում է, ինչի՞ մասին է խոսքը: Սա այն դեպքն է, որ վարույթն իրականացնող մարմինն ակնհայտ գործում է քաղաքական իշխանության ցանկություններն իրականություն դարձնելու մակարդակում»,- ասաց Մակինյանը:

Անդրադառնալով փողերի լվացման մեղադրանքի հանցակազմին՝ փաստաբանը նշեց, որ պարոն Մինասյանն իր օրինական գումարը, որի ծագման աղբյուրը հայտնի է, որի օրինականությունը հաստատված է քրեական գործով, որ այդ օրինական գումարները իր մի բանկային հաշվից փոխանցել է իր մյուս բանկային հաշվին, ինչը վարույթն իրականացնող մարմինը դիտարկել է որպես փողերի լվացում:

Հեղինակ՝ Իզաբել Սահակյան

Աղբյուր` Փաստինֆո