Փաստ ինֆո

Հնարավոր չէ Արցախի ժողովրդի դեմ բանակցային գործընթացում ինչ-որ գործողություն իրականացնել ու փորձել դա փաթաթել Արցախի ժողովրդի վրա:«Փաստինֆո»-ի հետ զրույցում ասել է ասաց Արցախի Ազգային ժողովի «Դաշնակցություն» խմբակցության ղեկավար Արմեն Սարգսյանը՝ անդրադառնալով Ռուսաստանի արտաքին գործերի նախարար Սերգեյ Լավրովի հայտարարությանը, թե բանակցային սեղանին մի փաստաթուղթ է, որը ենթադրում է ԼՂ հակամարտության կարգավորման փուլային տարբերակը:

Դաշնակցական գործչի ներկայացմամբ՝ Արցախում ժողովուրդը շատ հանգիստ է, քանի որ բազմաթիվ նման հայտարարություններ է լսել սկսած Լևոն Տեր-Պետրոսյանի ժամանակներից: «Այնքան նման բաներ ենք լսել... Մենք գիտենք՝ հնարավոր չէ Արցախի հարցը լուծել առանց մեր մասնակցության»,- ասաց նա։

Խմբակցության ղեկավարը պատահական չի համարում, որ Լավրովի հայտարարությունը հնչեց Մամեդյարով-Մնացականյան տեսակոնֆերանսից առաջ. «Պատահական չէ, որ այս հայտարարությունն այս ժամանակաշրջանում հնչեցվեց, դա, իմ կարծիքով, նաև ժողովրդի տրամադրությունն ստուգելու համար էր, որպեսզի հասկանան ժողովրդի կամ տարբեր քաղաքական ուժերի արձագանքը»:

Սարգսյանն ընդգծեց, որ Դաշնակցության կարծիքով Հայաստանը պետք է մասնակցի բանակցային գործընթացին որպես Արցախի անվտանգության ու անկախության երաշխավոր, իսկ Արցախը լինի լիիրավ կողմ:

«Հայաստանը չպետք է դուրս մնա այս գործընթացից: Երկար տարիներ ՀՀ արտաքին գերատեսչությունն անկախություն բառը, կարծես թե, չի օգտագործում: Ճիշտ է, այս տարիների ընթացքում խոսվում է հողերը չհանձնելու մասին, ասում են, որ Հայաստանն Արցախի անվտանգության երաշխավորն է, բայց հասկանալի չէ՝ ինչու չի ասվում, որ Հայաստանը անկախության և անվտանգության երաշխավորն է: Հետաքրքիր է, որ այս «անկախություն» բառը միշտ բաց է թողնվում, չնայած հաջորդ նախադասությամբ միշտ ասում են, որ պետք է գործի ինքնորոշման իրավունքը»,-ասաց «Դաշնակցություն» խմբակցության ղեկավարը:

Դիտարկմանը, թե հայաստանյան քաղաքական ուժերի կողմից մտահոգություններ են հնչում հնարավոր ճնշումների մասին` պարտադրելու փուլային տարբերակը, ինչը տարիներ առաջ մերժվել էր ու դարձել ընդհուպ Լեւոն Տեր-Պետրոսյանի հրաժարականի պատճառը, Սարգսյանը պատասխանեց, որ դրսից ճնշումների հետ զուգահեռ պետք է ճնշումներ լինեն երկրի ներսից, որպեսզի ղեկավարությունը կարողանա դիմակայել արտաքին ճնշումներին:

«Մենք գտնում ենք, որ քաղաքական ուժերը ցանկացած իրավիճակում պետք է ճնշումներ գործադրեն, առավելապես այս հարցում, երբ խոսքը մեր ապագայի մասին է: Եթե իշխանության նկատմամբ ճնշումներ են գործադրում, ապա այստեղ արդեն անձնականացված կամ կուսակցականացված չէ, թե ով է իշխանության գլուխը: Ներքին ճնշումներ անպայման պետք է լինեն, քանի որ դրանց դեպքում իշխանությունը կարող է դիմագրավել արտաքին ճնշումներին: Եթե ներսից ճնշումներ չլինեն ապա իշխանության համար շատ դժվար կլինի դրսի ճնշումներին դիմագրավելը»,-ասաց խմբակցության ղեկավարը:

Մեր զրուցակցի գնահատմամբ, Արցախում անկախությունից հետո շատ հետաքրքիր մթնոլորտ կա՝ ոչ միայն քաղաքական ուժերն են, որ արձագանքում են տարբեր հայտարարություններին, այլև ժողովուրդն է ուշի ուշով հետևում դրանց:

«Քաղաքական ուժերը, եթե ցանկանան էլ չեն կարող ժողովրդի ասածից տարբերվող բան ասել: Արցախում այնքան հստակ է ժողովրդի կարծիքը, որ նույնիսկ հնարավոր չէ ինչ-որ խումբ գտնել, որի տեսակետը կտարբերվի ժողովրդի կարծիքից: Այսինքն, եթե տարբեր տեղերում տարբեր կարծիքներ կան, ապա Արցախում կարծիքը միանշանակ մեկն է»,-ամփոփելով խոսքն ասաց «Դաշնակցություն» խմբակցության ղեկավար Արմեն Սարգսյանը:

Հեղինակ՝ Սոնա Գեւորգյան

Աղբյուր` Փաստինֆո