Փաստ ինֆո

Ռուսաստանի արտգործնախարար Սերգեյ Լավրովի հայտարարությունը ոչ միայն տեղեկացնում էր, թե ինչ է կատարվում բանակցությունների ժամանակ, այլև այստեղ կա քաղաքականություն, ազդակ՝ ուղղված Երեւանին:

«Փաստինֆո»-ի հետ զրույցում քաղաքագետ Ստեփան Դանիելյանը նկատեց՝ ռուսական մամուլի վերջին շրջանի հոդվածներից ակնհայտ է դառնում, որ հայ-ռուսական հարաբերություններից դժգոհություն կա, ինչի մասին խոսեց նաև Լավրովը մասնավորապես անդրադառնալով ռուսական ձեռնարկությունների հետ կապված խնդրին. «Կարելի է ենթադրել, որ դրանով ուղղակի ցույց են տալիս, որ Ռուսաստանի և Հայաստանի հարաբերություններում կան խնդիրներ: Այստեղ կարևոր է նաև Լավրովի տոնայնությունը: Երբ դատավարությունների մասին նշեց, հետո որոշակի դադար տվեց, այնուհետև ավելացրեց ռուսական ձեռնարկությունները: Հնարավոր է Լավրովը նկատի ուներ նաև այլ դատավարություններ, այդ թվում ՀՀ երկրորդ նախագահ Ռոբերտ Քոչարյանի դատավարությունը: Նրա տոնայնությունից կարելի է նման ենթադրություն անել»,-ասաց քաղաքագետը:
Վերջինս ենթադրում է, որ Լավրովի հայտարարությունը հնարավոր է նաև ուղերձ էր Հայաստանի հանրությանը, որ հայ-ռուսական հարաբերություններում առկա են խնդիրներ, որոնք կարող են իրենց ազդեցությունն ունենալ Արցախի շուրջ տեղի ունեցող բանակցությունների վրա:

Դիտարկմանը արդյոք կարող ենք ենթադրել, որ վերադառնում ենք այն կետին, որը մերժել ենք դեռ ՀՀ առաջին նախագահի ժամանակ, քաղաքագետն ասաց. «Գործող իշխանությանը կարող ենք մեղադրել ոչ պրոֆեսիոնալիզմի, անլրջության մեջ, բայց հեռու եմ նրանց դավաճանության և նման հարցը թաքցնելու մեջ մեղադրելուց: Այլ բան է, որ իրենց չմտածված գործողությունների հետևանքով կարող են մտնել ինչ-որ փուլային տարբերակի մեջ: Շատ դեպքերում նաև իրենց կամքից անկախ այդ վտանգը կա, բայց չեմ կարծում նրանք մտածված կերպով կգնան նման քայլի»,-ասաց Ստեփան Դանիելյանը:

Անդրադառնալով հարցին ինչու դիվանագետները հանրության հետ անկեղծ չեն, քաղաքագետը նշեց` բանակցությունների և շփումների ժամանակ լինում են փակ թեմաներ, որոնք հասարակության առաջ չեն բացվում. «Արցախի շուրջ բանակցությունների ժամանակ նույնպես կան թեմաներ, որոնց մասին հասարակությանը չպետք է ասեն: Սակայն կա հարցի մյուս կողմը: Սա այն հարցն է, որ շատ զգայուն և ճակատագրական է Հայաստանի համար և այստեղ շատ կարևոր է ունենալ հանրությանը վստահությունը, սակայն տեսնում եմ, որ գոնե հանրության մի զգալի հատվածը չունի վստահություն և դրա պատճառները մի քանիսն են: Նախ` Նիկոլ Փաշինյանի բազմաթիվ իրարամերժ և որոշ դեպքերում նույնիսկ անհասկանալի հայտարարությունները: Բացի այդ՝ պրոֆեսիոնալիզմի խնդիր կա: Նիկոլ Փաշինյանի կողքին պրոֆեսիոնալ թիմ չկա և դա տեսնում ենք տարբեր ոլորտներում: Եվ եթե օրինակ քաղավիացիայի և մյուս ոլորտներում կա պրոֆեսիոնալիզմի պակաս, ապա դիվանագիտական ոլորտում, առավել ևս Արցախի հարցում կարող ենք ենթադրել, որ նման ոչ պրոֆեսիոնալ մոտեցում կարող է լինել»,-հավելեց Ստեփան Դանիելյանը:

Հիշեցնենք, որ ԵԱՀԿ Մինսկի խմբի համանախագահ ՌԴ արտաքին գործերի նախարար Սերգեյ Լավրովն ապրիլի 21-ին հայտարարել է, որ բանակցային սեղանին քննարկվում է Ղարաբաղյան կարգավորման փուլային տարբերակը և դրա շուրջ համաձայնությունը քայլ կլինի ՄԱԿ-ի անվտանգության խորհրդի բանաձևերը կյանքի կոչելու ճանապարհին:

Հեղինակ՝ Հասմիկ Կոշկարյան

Աղբյուր` Փաստինֆո