Փաստ ինֆո

Վերաքննիչ քրեական դատարանը՝ նախագահությամբ դատավոր Արմեն Բեկթաշյանի, մերժել է վարույթ ընդունել ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանի վերաքննիչ բողոքը: Այս մասին «Փաստինֆո»-ն տեղեկացավ Դատական տեղեկատվական համակարգից:

Վերաքննիչ դատարանը արձանագրել է, թե վերաքննիչ բողոքում պետք է նշվի այն դատական ակտը, որի դեմ ներկայացվել է բողոք, որպիսի պահանջը ինքնանպատակ չէ. այն Վերաքննիչ դատարանին հնարավորություն է տալիս պարզելու, թե ինչ դատական ակտ է բողոքարկվում և այդ կերպ որոշելու բողոքը վարույթ ընդունելու հարցը: Դատարանը գտել է, որ տվյալ դեպքում պաշտպան Հայկ Ալումյանի կողմից բողոքարկվել է 16.03.2019 թվականի միջնորդությունը Երևան քաղաքի առաջին ատյանի ընդհանուր իրավասության դատարանի կողմից չքննելը, այսինքն՝ առկա չէ առաջին ատյանի դատարանի դատական ակտ և պաշտպանի կողմից փաստացի բողոքարկվել է առաջին ատյանի դատարանի անգործությունը, ինչը ՀՀ քրեական դատավարության օրենսգրքի 376.1-րդ հոդվածի լույսի ներքո բողոքարկման ենթակա չէ: Միաժամանակ Դատարանը հարկ է համարել արձանագրել, որ ՀՀ քրեական դատավարության օրենսգրքի որևէ այլ դրույթով նույնպես նախատեսված չէ «16.03.2019 թվականի միջնորդությունը Երևան քաղաքի առաջին ատյանի ընդհանուր իրավասության դատարանի կողմից չքննելը» ՀՀ վերաքննիչ քրեական դատարան բողոքարկելու հնարավորություն:

Ավելի վաղ տեղեկացրել ենք, որ մարտի 16-ին Ռոբերտ Քոչարյանի պաշտպանները միջնորդություն են ներկայացրել՝ երկրորդ նախագահին անձնական երաշխավորությամբ ազատ արձակելու մասին, սակայն մարտի 17-ին նշանակված դատական նիստը հետաձգվել է ու առ այսօր չի քննարկվել։ Ընդ որում՝ փաստաբանները նախապես ճշտել էին դատարանից, որ նշանակված նիստը կայանալու է , բայց չի կայացել։ Հետագայում պարզվեց, որ Աննա Դանիբեկյանն անաշխատունակության թերթիկ է վերցրել մարտի 13-ից մինչեւ ապրիլի 16-ը, որի ընթացքում պետպատվերի շրջանակներում քթի վիրահատություն է արել։ Անաշխատունակության ժամկետը լրանալուց հետո էլ՝ ապրիլի 17-ին հայտնի դարձավ, որ դատավորը հիմա էլ հերթական արձակուրդ է վերցրել մինչեւ մայիսի 7-ը։

Ռոբերտ Քոչարյանի պաշտպանական խմբի անդամ Հայկ Ալումյանը վերաքննիչ բողոք է ներկայացրել ՝ պահանջելով Ռոբերտ Քոչարյանին անձնական երաշխավորությամբ ազատ արձակելու մասին միջնորդությունը դատարանի կողմից չքննելը, դրա քննությունն անորոշ ժամկետով հետաձգելը ճանաչել ոչ իրավաչափ: Պաշտպանն արձանագրել էր, որ կալանավորումը չորս անձանց անձնական երաշխավորությամբ փոխարինելու մասին միջնորդությունը դատարանի կողմից չքննելու, դրա քննությունն անորոշ ժամկետով հետաձգելու արդյունքում խախտվել են «Մարդու իրավունքների և հիմնարար ազատությունների պաշտպանության մասին» Եվրոպական կոնվենցիայի 5-րդ հոդվածի 3-րդ և 4-րդ կետերով երաշխավորված՝ Ռոբերտ Քոչարյանի իրավունքներն ու ազատությունները: Փաստաբանը պահանջել է, որ Վերաքննիչ քրեական դատարանը ճանաչի Ռոբերտ Քոչարյանի իրավունքների խախտումները և վերացնի այն՝ քննության առնելով կալանքն անձնական երաշխավորությամբ փոխարինելու մասին միջնորդությունը և բավարարի այն:

Հեղինակ՝ Իզաբել Սահակյան

Աղբյուր` Փաստինֆո