Փաստ ինֆո

Արտակարգ դրություն հայտարարելուց օրեր անց մի խումբ երիտասարդներ սկսեցին «Օգնենք կարիքավոր ընտանիքներին» նախաձեռնությունը, որը միտված է օգնելու կարիքավոր ընտանիքներին, մասնավորապես օրավարձով ապրող ընտանիքներին, որոնք այս ժամանակահատվածում չեն աշխատում և չեն օգտվում պետական աջակցության ծրագրերից:

«Փաստինֆո»-ի հետ զրույցում նախաձեռնության անդամ Համլետ Խնկոյանը պատմեց սկզբում որոշել են քիչ թվով ընտանիքների օգնել, սակայն ժամանակի ընթացքում նախաձեռնությանը միացել են նոր մարդիկ, որոնք ևս ցանկություն են հայտնել իրենց ներդրումն ունենալու: Անգամ գտնվեցին մարդիկ, որոնք ոչ միայն գումար, այլև սնունդ տրամադրեցին, իսկ նախաձեռնության անդամները հավաքված գումարով գնում են առաջին անհրաժեշտության սննդամթերք և ընտանիքների համար պատրաստում արկղեր. «Արկղը պարունակում է առաջին անհրաժեշտության սնունդ շաքարավազ, ալյուր, բրինձ, ձու, քաղցրավենիք, ձեթ, սակայն հիմնական պարունակությունը հաճախ համալրվում է, քանի որ շատ կազմակերպություններ, միանալով նախաձեռնությանը, տրամադրում են հավելյալ սննդամթերք: Աշխատում ենք գումարային աջակցություն չցուցաբերել, որովհետև եթե գումար տրամադրենք, գուցե առաջնությունը տան ոչ թե սննդին, այլ ինչ-որ վճարումների և դրանից ընտանիքի երեխան կարող է տուժել»,-ասաց Համլետ Խնկոյանը:

Հարցին որքան է մեկ արկղը բավարարում մեկ ընտանիքին՝ Համլետ Խնկոյանը նկատեց՝ կախված է ընտանիքի մեծությունից: Եթե երեքից չորս հոգու համար է, ապա մեկ արկղը երկու շաբաթ բավականացնում է, իսկ մեծ ընտանիքներին տրամադրում են երկու արկղ: Ի սկզբանե նախաձեռնության անդամները որոշել էին օգնություն ցուցաբերել Երևանում բնակվող կարիքավոր ընտանիքներին, սակայն աջակցության աշխարհագրությունն ընդլայնվեց և դուրս եկավ Երևանից. ««Եկեք օգնենք» հիմնադրամը Խարբերդի ընտանիքների հասցեները տրամադրեց և իսկապես ամենավատ վիճակում գտնվում էին հենց Խարբերդի բնակիչները, որոնք դոմիկներում էին ապրում: Շատ են օրավարձով աշխատողները, որոնք սովորաբար աշխատել են և կարողացել են հոգալ իրենց ծախսերը, սակայն հիմա աշխատանք չունեն և բառիս բուն իմաստով երեխաները տանը սոված են մնում: Խարբերդում մեծ թվով ընտանիքների կարողացանք օգնել, Արմավիրի մարզի Լեռնագոգ համայնքում մոտ 40 ընտանիքի օգնեցինք, Նալբանդյան գյուղում 19 ընտանիքի: Այս պահի դրությամբ արդեն 250 ընտանիքի օգնել ենք: Այս գործում իրենց ներդրումն ունեցան նաև Հայ կրթական հիմնարկությունը»,-նշեց Համլետ Խնկոյանը:

Նրա խոսքով նախաձեռնությունում բոլորը կամավոր են կան անգամ գործարարներ, որոնք իրենց մեքենաներով են արկղերի առաքումներն անում և հասցնում դրանք կարիքավոր ընտանիքներին. «Ի սկզբանե նպատակը եղել է բարի վարակի տարածումը, ինչը ստացվել է, քանի որ մեզ շարունակում են միանալ մարդիկ և այսկերպ կկարողանանք օգնել շատ ընտանիքների»,-եզրափակեց Հ. Խնկոյանը:

Հեղինակ՝ Հասմիկ Կոշկարյան

Աղբյուր` Փաստինֆո