Փաստ ինֆո

Թեև Վերաքննիչ քրեական դատարանն ազատ է արձակել «Բավրայի» գործով մաքսակետի հերթափոխի պետ Դավիթ Հակոբջանյանին՝ պաշտպանը վճռաբեկ բողոք է ներկայացրել՝ գտնելով, որ դատարանը չի անդրադարձել վերաքննիչ բողոքում արձանագրված բոլոր հանգամանքներին: Այս մասին «Փաստինֆո»-ին հայտնեց Հակոբջանյանի պաշտպան Գոռ Միքայելյանը։

Ավելի վաղ տեղեկացրել ենք, որ Վերաքննիչ քրեական դատարանը՝ դատավոր Մհեր Արղամանյանի նախագահությամբ, բավարարել է Դավիթ Հակոբջանյանին կալանավորելու որոշման դեմ պաշտպանի բողոքը:

Վերաքննիչ քրեական դատարանը գտել է, որ դատարանն այդ օրը հերթապահ չի եղել և իրավունք չուներ քննելու Հակոբջանյանին կալանավորելու միջնորդությունը:

«Միայն այն հանգամանքը, որ Վերաքննիչ քրեական դատարանը գտել է, որ Մնացական Մարտիրոսյանն իրավունք չուներ քննարկելու կալանավորման միջնորդությունն, արդեն շատ հետաքրքիր է: Միգուցե այս ամենի արդյունքում որոշակիորեն կպակասի միջնորդություններն իրենց «սրտի» դատավորներին հասցեագրելու արատավոր պրակտիկան, որովհետև միջնորդություններ կան, որոնք կբավարարեն միայն նման դատավորները»,- նշեց Միքայելյանը:

Փաստաբանի խոսքով՝ Վերաքննիչ քրեական դատարանն այլ հանգամանքների չի անդրադարձել, մինչդեռ՝ բարձրացվել են այնպիսի հարցեր, ինչպիսիք են՝ արդյո՞ք կալանավորման նոր միջնորդություն ներկայացնելու համար նոր հանգամանք կար, արդյո՞ք Հակոբջանյանն ունի մեղադրյալի դատավարական կարգավիճակ, արդյո՞ք առկա էր հիմնավոր կասկած, արդյո՞ք առկա էին կալանավորման հիմքերը:

«Բավրայի» մաքսակետի գործը մեծ աղմուկ ստացավ կառավարության նիստում վարչապետի հնչեցրած հայտարարություններից հետո։

Հիշեցնենք՝ փետրվարի 6-ին՝ կառավարության նիստում վարչապետը հայտարարել էր, թե Բավրայի մաքսակետում «անցած գիշեր բացահայտվել է մաքսանենգության խոշոր դեպք, որում ներգրավված են մաքսային ծառայության մի շարք աշխատողներ», ինչից որոշ ժամանակ անց ԱԱԾ-ն պաշտոնական հաղորդագրություն տարածեց, թե ՀՀ պետական եկամուտների կոմիտեի հյուսիսային մաքսատուն-վարչության իշխանության ներկայացուցչի գործառույթներ իրականացնող «Բավրա» մաքսակետի հերթափոխի պետը եւ մաքսային 2 տեսուչ, 2020 թ. հունվարի 25-ին ընդունելով բեռնափոխադրումներ իրականացնող կազմակերպության համասեփականատիրոջ առաջարկը, համաձայնության են եկել առանձնապես խոշոր չափի՝ 1.436.610 ՀՀ դրամին համարժեք 3000 ԱՄՆ դոլար կաշառք ստանալու դիմաց, առանց պատշաճ մաքսային հսկողության եւ ձեւակերպման մաքսային տարածքից բաց թողնել հիշյալ կազմակերպության կողմից Վրաստանից տեղափոխվող շուրջ 4.5 տոննա ընդհանուր քաշով բեռը:

Ինչպես ավելի վաղ տեղեկացրել էինք՝ փետրվարի 8-ին Երևանի ընդհանուր իրավասության դատարանը՝ նախագահությամբ դատավոր Հ․Մանուկյանի, մերժել էր հերթափոխի պետին կալանավորելու մասին ԱԱԾ քննիչի միջնորդությունը, սակայն ԱԱԾ քննչականը շարունակել էր նրան արգելանքի տակ պահել` անգամ ձերբակալության 72 ժամը լրանալուց հետո: Քննիչը նոր միջնորդություն էր ներկայացրել կալանավորելու՝ առանց մեղադրանքի ծավալ փոխելու, ինչը մակագրվել էր դատավոր Մնացական Մարտիրոսյանին։ Երկրորդ միջնորդությունն արդեն բավարարվել էր։

Հեղինակ՝ Իզաբել Սահակյան

Աղբյուր` Փաստինֆո