Փաստ ինֆո

Երևանի ընդհանուր իրավասության դատարանի դատավոր Աննա Դանիբեկյանի քթի վիրահատության վերաբերյալ մամուլի հրապարակումները Ոստիկանությունն ստացել է և հանձնարարականի համաձայն՝ արդյունքների մասին կտեղեկացնեն Դատախազությանը: Այս մասին «Փաստինֆո»-ին հայտնեցին Ոստիկանությունից: 

Հիշեցնենք, որ ՀՀ երկրորդ նախագահի և մյուսների գործով դատական նիստերն արդեն մեկ ամսից ավել է, ինչ չեն կայանում՝ այն դեպքում, երբ ներկայացված է խափանման միջոցի վերաբերյալ միջնորդություն: Ըստ պաշտոնական տեղեկատվության՝ դատավորը վիրահատվել էր, ապա՝ հայտնի դարձավ, որ ներկայացրել է անաշխատունակության թերթիկ ՝ մարտի 13-ից մինչև ապրիլի 16-ը: Ապրիլի 9-ին մամուլում տեղեկություն հայտնվեց, որ Աննա Դանիբեկյանը պետպատվերի շրջանակներում վիրահատել է քիթը, ուստիեւ նիստն անորոշ ժամանակով հետաձգվել է ու երկրորդ նախագահի խափանման միջոցի վերաբերյալ միջնորդությունը չի քննարկվում։

Այս տեղեկատվությունը հասարակական-քաղաքական շրջանակներում մեծ արձագանք է գտել ու գնահատվել որպես հեգնանք արդարադատության նկատմամբ։

Պաշտոնական որեւէ մարմին տեղեկատվությունը չի հերքել։ Փոխարենը ապրիլի 14-ին ԲԴԽ-ն հայտարարություն տարածեց, թե դատավոր Աննա Դանիբեկյանի քթի վիրահատության վերաբերյալ մամուլի հրապարակումների առնչությամբ հրավիրել է գլխավոր դատախազության ուշադրությունը՝ օրենքով սահմանված կարգով դրանց քրեաիրավական գնահատական տալու համար: Մասնավորապես՝ ԲԴԽ-ն գտել է, թե հրապարակել են օրենքով պաշտպանված տեղեկություններ /բժշկական գաղտնիք պարունակող, անձնական կյանքին վերաբերող/։ Ապրիլի 16-ին դատախազությունից հայտնեցին, որ մամուլի հրապարակումներն ուղարկվել են ոստիկանություն՝ նյութեր նախապատրաստելու հանձնարարությամբ։ Վերջինս առայժմ չի շտապում տեղեկացնել, թե նյութերի նախապատրաստման արդյունքներով քրեական գործ հարուցվել է, թե ոչ։

«Այլընտրանք» ՀԿ համանախագահ Նարեկ Մանթաշյանը «Փաստինֆո»-ին հայտնեց, որ իրեն չեն հրավիրել ոստիկանություն՝ բացատրություն տալու: Փաստաբան Ալեքսանդր Կոչուբաևը եւս ոստիկանություն չի հրավիրվել, բայց սրտատրոփ սպասում է, թե երբ կհրավիրեն հարցաքննության:

«Մինչև ԲԴԽ-ն դրան գնահատական կտար, ես ինքս ասուլիսին ասել եմ, որ իրավական առումով այդտեղ խնդիր կա, թե ինչպես են այդ տվյալները հանրամատչելի դարձել: Ես ինքս ասուլիսում Դատախազությանը կոչ եմ արել և այնպես չէ, որ ԲԴԽ-ն նոր հեծանիվ է հայտնաբերել: Նորություն չունեմ և կարծում եմ, որ չի էլ լինի, եթե, իհարկե, ճնշումներ չլինեն մեդիայի կողմից, ընդ որում՝ նաև մեր կողմից»,- ասաց Կոչուբաևը:

Հեղինակ՝ Իզաբել Սահակյան

Աղբյուր` Փաստինֆո