Փաստ ինֆո

Կարմիր գծերին վերաբերող օրինագծի հիմնական կետերը քաղաքացիների հետ որևէ կապ չունեն: Կարմիր գծերը 10 վարչական շրջաններից հանելը պայմանավորված է նրանով, որ մինուսով են աշխատում և օգուտ չեն բերում այդ կայանատեղիները: «Փաստինֆո»-ի հետ զրույցում նման կարծիք արտահայտեց «Վարորդի ընկեր» ՀԿ փոխնախագահ Դավիթ Պեդանյանը:
Հիշեցնենք, որ ԱԺ «Իմ քայլը» խմբակցության պատգամավորներ Սիսակ Գաբրիելյանը և Սիփան Փաշինյանը շրջանառության մեջ են դրել օրինագիծ, որով նախատեսվում է կարմիր գծերը թողնել 12 վարչական շրջաններից միայն երկուսում Կենտրոնում և Արաբկիրում:

Հարցին՝ արդյոք օրինագծի ընդունումից հետո մարդիկ մյուս 10 վարչական շրջաններում մեքենա կայանելու խնդիր չեն ունենա, Դավիթ Պեդանյանը նկատեց մարդիկ ունենալու են այն նույն խնդիրները, ինչ միշտ ունեցել են. «Բացառությամբ այն, որ փողոցները գծած չեն լինելու: Այսինքն այդ տեսանկյունից ոչինչ չի փոխվել: Նախկինում մարդիկ վճարում էին 12 վարչական շրջանում կայանելու համար, այժմ վճարելու են 2 վարչական շրջանում կայանելու համար: Խոսք է գնում, որ վճարի փոփոխություն տեղի չի ունենալու, սակայն կարծում եմ օբյեկտիվորեն տարեկանի դեպքում փոփոխություն պետք է լինի»,-ասաց Դավիթ Պեդանյանը:

Վերջինս նշեց, որ բոլոր վճարովի ավտոկայանատեղիները պետք է տեսանկարահանող սարքերով կահավորվեն, ինչն ահռելի ծախս է և 12 վարչական շրջանը չեն կարողանալու կահավորել, հետևապես, Դավիթ Պեդանյանի խոսքով, այստեղ օպտիմալացման, ռեսուրսը չվատնելու գործընթաց է տեղի ունենում:

Հարցին քաղաքացու համար օրինագծից ոչինչ չի փոխվելու, Դավիթ Պեդանյանն ասաց. «Շտկվելու է վարչարարությունը: Այսինքն եթե մարդուն տուգանում են, այդ տուգանքը հիմնված է լինելու ոչ թե վարչական մարմնի ներքին համոզմունքի վրա, այլ օբյեկտիվ տեսանկարահանման վրա է հիմնված լինելու: Ոստիկանությունը պետք է հատկապես ուրախ լինի տեսանկարահանող սարքերի համար»,-հավելեց Դ. Պեդանյանը:

Օրինագծում կա կետ, որի համաձայն առանց պետհամարանիշի մեքենաները կայանատեղիներից տարհանվելու են, ինչը Դ. Պեդանյանի խոսքով անօրինական է և մարդու իրավունքների խախտում է ենթադրում. «Կայանված մեքենան մարդու սեփականությունն է, հավասարեցվում է անշարժ գույքի հետ: Ի վերջո հնարավոր է, որ մեքենան կայանած լինեն և պետհամարանիշներն ուղղակի գողանան: Դա աբսուրդ է և կարծում եմ չի ընդունվի: Բացի այդ խոսքը գնում է Կենտրոնի և Արաբկիրի մասին, որտեղ ենթադրվում է կայանատեղիների պիկ է, այսինքն՝ միշտ զբաղված են և հետաքրքիր է տեսնել ինչպես են երկու մեքենաների արանքից էվակուացնում առանց պետհամարանիշի մեքենան»,-նշեց Դ. Պեդանյանը:

Վերջինս հավելեց դեռ երկու տարի առաջ հանդիպում են ունեցել Երևանի նորընտիր ավագանու, փոխքաղաքապետերի հետ և քննարկում ունեցել այս հարցի շուրջ: Հենց նրանք էլ սկզբում ներկայացրել են վճարովի ավտոկայանատեղիները 10 վարչական շրջաններից հանելու միտքը, քանի որ քիչ էին մեքենաներ կայանում, չէին վճարում, վերահսկողություն էլ չկար, սակայն Դավիթ Պեդանյանի վստահեցմամբ դա առաջին քայլն էր միայն և ամենևին չէր ենթադրվում, որ հարցը դրանով կլուծվի. «Մտածում էինք մի մոդել, որը պետք է ծառայեր այդ վճարովի ավտոկայանատեղիների իրական գաղափարին, այն է բեռնաթափումը և էկոլոգիական խնդիրների լուծումը:

Այսինքն՝ այդ մոդելի մեջ մտնում էին ոչ միայն ավտոկայանատեղիների ճիշտ տեղաբաշխումը, այլև վճարումների հետ կապված որոշ վերանայումներ և մի շարք այլ միջոցառումներ: Սակայն այդ ամենը պետք է գործեր այն ժամանակ, երբ ունենայինք հասանելի հասարակական տրանսպորտ: Խոսքը գնում է այն մասին, որ պետությունը միջոցներ է ներդրել քաղաքի ներսում տեղաշարժի համար և դրանից հետո խրախուսում է հասարակական տրանսպորտի օգտագործումն ու մարդկանց ուղղորդում, որ հրաժարվեն մեքենաներից: Մեր փոփոխությունների պլանը նախատեսված էր այն սցենարի համար, երբ հասարակական տրանսպորտը ներդրված կլիներ»,-ասաց Դավիթ Պեդանյանը` ընդգծելով, որ անհրաժեշտ էր ստեղծել նաև ալտերնատիվ, անվճար կայանատեղիներ: Տարբեր երկրներում այդ մոդելը տարբեր կերպ է աշխատում, օրինակ հնարավոր է մի մայթը վճարովի լինի կայանելը, իսկ մյուս մայթն անվճար և նման այլ տարբերակներ:

Հեղինակ՝ Հասմիկ Կոշկարյան

Աղբյուր` Փաստինֆո