Փաստ ինֆո

Երևանի ընդհանուր իրավասության դատարանը՝ դատավոր Գոռ Թորոսյանի նախագահությամբ, վարույթ չի ընդունել ՀՀ երկրորդ նախագահ Ռոբերտ Քոչարյանի հայցադիմումն ընդդեմ ՀՀ-ի՝ ի դեմս Քրեակատարողական ծառայության: 

Ավելի վաղ «Փաստինֆո»-ն տեղեկացրել է, որ ՀՀ երկրորդ նախագահ Ռոբերտ Քոչարյանը հայցադիմում ներկայացնելով ընդդեմ ՀՀ-ի՝ ի դեմս Արդարադատության նախարարության Քրեակատարողական ծառայության՝ պահանջել էր կանխել իրավունքները խախտող գործողությունները, մասնավորապես՝ անմարդկային վերաբերմունքը և խոշտանգումներ։

Դատարանն արձանագրել է, որ սույն գործով իրավահարաբերության բովանդակությունը վերաբերում պետության, ի դեմս քրեակատարողական ծառայության անգործության հետևանքով խոշտանգումների չենթարկվելու հիմնական իրավունքի խախտմանը: «Գործով հայցի հիմքում դրվել է այն փաստական հանգամանքը, որ հայցվորը, չնայած քրոնիկ հիվանդության և տարիքին, տեղափոխվել է կալանավայր, հայցվորին կալանավայր տեղափոխելու որոշումը կայացվել է այն նույն ժամանակ, երբ ՀՀ արդարադատության նախարարը բարձրաձայնել է դատախազությանը կալանքի փոխարեն այլ խափանման միջոցների կիրառման միջնորդություններ ներկայացնելու անհրաժեշտության մասին, հայցվորը տեղափոխվել է կալանավայր այն օրը, երբ պետությունը սկսել է ձեռնարկել միջոցներ նոր կորոնավիրուսային հիվանդության (COVID-19) վարակի դեմ պայքարի շրջանակներում կալանքի տակ գտնվող անձանց թիվ պակասեցնելու ուղղությամբ:

Սույն գործով հայցվորի ներկայացուցիչը խնդրել է կանխել հայցվոր Ռոբերտ Սեդրակի Քոչարյանի խոշտանգման չենթարկվելու իրավունքի խախտման պատասխանողի գործողությունները, այն է` դադարեցնել խոշտանգումը, բացառելով մինչև համավարակի ավարտը, կամ առնվազն մինչև արտակարգ դրության ավարտը հայցվորի գտնվելը քրեակատարողական հիմնարկում»,- նշել է դատարանը՝ ավելացնելով, որ սույն հայցադիմումով ներկայացված գործը վերաբերում է հանրային իշխանական լիազորություններով օժտված սուբյեկտի` պետության, ի դեմս ՀՀ արդարադատության նախարարության քրեակատարողական ծառայության կողմից հայցվորին կալանավայր տեղափոխելու որոշմանը և գործողություններին և հայցվորի քրեակատարողական հիմնարկում գտնվելու գործողությունները դադարեցնելուն, որպիսի պայմաններում դատարանը գտնում է, որ սույն գործը ծագում է հանրային իրավահարաբերություններից և ենթակա չէ քննության քաղաքացիական դատավարության կարգով»,- նշել է դատարանը:

Հայցադիմումի վարույթ ընդունելը մերժելու մասին որոշումը կայացվել է ապրիլի 20-ին։

Աղբյուր` Փաստինֆո