Փաստ ինֆո

Այս երկու տարիների ընթացքում մեր կառավարությունը, մենք և վարչապետը եղել ենք առավել քան թափանցիկ և մեր դիրքորոշումները, մեր մոտեցումներն արտահայտել ենք շատ պարզ ձևով: Այս մասին ասուլիսին ասել է ԱԳՆ նախարար Զոհրաբ Մնացականյանը՝ անդրադառնալով Լավրովի հայտարարությանը:

Հիշեցնենք, որ ԵԱՀԿ Մինսկի խմբի համանախագահ ՌԴ արտաքին գործերի նախարար Սերգեյ Լավրովն այսօր հայտարարել է, որ բանակցային սեղանին քննարկվում է Ղարաբաղյան կարգավորման փուլային տարբերակը և դրա շուրջ համաձայնությունը քայլ կլինի ՄԱԿ-ի անվտանգության խորհրդի բանաձևերը կյանքի կոչելու ճանապարհին:

Մնացականյանի ներկայացմամբ՝ մեկնաբանության մեջ եղել են հղումներ ուղղված տարբեր փաստաթղթերի և խոսքը գնացել է նաև այն մասին, թե ինչ փաստաթղթի մասին խոսք եղել այս երկու տարիների ընթացքում:

«Նման մոտեցումներ ի հայտ են եկել 2014, 2016թթ և այդ մոտեցումներն ընդունելի չեն եղել հայկական կողմերի համար: 2018թ ի վեր քննարկումները տարվել են առանձին տարրերի շուրջ՝ կողմերի մոտեցումների, քննարկման, գնահատման վերաբերյալ: 2014թ առաջարկած տարբերակը այսօր բանակցային սեղանի փաստաթուղթ չէ»,- ասաց Մնացականյանը:

Նրա խոսքով՝ առավել քան հստակ խոսել են դիրքորոշումների մասին, որտեղ հայկական կողմերի համար ընդգծված և առաջնային գերակայություն է անվտանգության բաղադրիչը:

Մնացականյանի խոսքով՝ այն, ինչ նշվել է ամենից բացի դա անվտանգության գոտի է և պաշտպանական գծեր, որևէ կերպ, որևէ հայկական կողմ չի կարող նույնիսկ ենթադրել, որ հնարավոր է վերանայել դա՝ վտանգի տակ դնելով Արցախի բնակչության անվտանգության խնդիրը։ Վերջինս ընդգծեց, որ որևէ կերպ անհնար է ենթադրել, որ հայկական կողմերից որևէ մեկը կարող է գնալ զիջումների, որոնք կրկին կարող են վտանգի տակ դնել Արցախի բնակչության անվտանգությունը։

«Երկրորդ կարևոր տարրը այն է, որ հիմնական սկզբունքների մեջ գոյություն ունի ինքնորոշման սկզբունքը, որը հայկական կողմերի համար առաջնային, գերակա տարրն է այս բանակցային գործընթացում։ Դա մենք կոչել ենք՝ անվտանգություն և ստատուս։ Ես հիմա նորից ասում եմ, որ ինքնորոշման իրավունքի արտահայտումը նշանակում է ստատուսի հստակեցում, ազատ կամարտահայտության իրավունքը՝ առանց սահմանափակումների։ Խաղաղ կարգավորումը հնարավոր է փոխզիջումների միջոցով։ Զիջումներ չեն եղել և չեն լինելու։ Հայկական կողմերը որևէ դեպքում, երբևէ չեն ստանձնելու նման մոտեցում, որը ենթադրի անվտանգության խափանում, ԼՂՀ բնակչության համար սպառնալիքի ստեղծելուն, առավել ևս այն դեպքում, երբ այդ սպառնալիքը մնում է ռեալ և էքզիստենցյալ:Հայկական կողմի համար առավել քան առաջնային է ինքնորոշման սկզբունքի արտահայտումը բանակցային գործընթացում։ Փոխզիջումները պետք է լինեն համաչափ, որի մեջ հայկական կողմերը տեսնում են լիարժեք արտահայտություն՝ անվտանգության և ստատուսի տարրերի։ Սա եղել է և մնում է հայկական կողմի մոտեցումը։»,- ասաց ԱԳ նախարարը։

Մնացականյանը նշեց, որ, եթե որևէ մեկը ենթադրում է, որ բանակցությունների ժամանակ կարող ենք ասել մի բան և մեկ այլ բան խոսել հասարակության հետ՝ խորապես սխալվում է։ Վերջինս վստահեցրեց, որ նման բան չի եղել և չի կարող լինել տրամաբանորեն:

«ՀՀ որևէ ներկայացուցիչ չի կարող նման բան անել՝ անկախ ամեն ինչից»,- ասաց Մնացականյանը։

Նրա խոսքով՝ հայաստանյան կողմը մշտապես նշել է, որ ինքը իր պատասխանատվությունն է կրում և ամբողջովին ներգրավված է բանակցային գործընթացի մեջ իր մասով և իր մասով ամբողջովին տանելու է այդ գործը։

Աղբյուր` Փաստինֆո