Փաստ ինֆո

Երևանի ընդհանուր իրավասության դատարանի դատավոր Դավիթ Բալայանը, ում ի սկզբանե մակագրված է եղել «Կոշ» ՔԿՀ նախկին պետ Լյովա Բաղդասարյանի գործը, ինքնաբացարկ է հայտնել: Այս մասին տեղեկանում ենք դատական տեղեկատվական համակարգից: Դատավոր Դավիթ Բալայանն իր քայլը պատճառաբանել է նրանով, որ Լյովա Բաղդասարյանին անձնապես ճանաչում է 2006-2007թթ, իսկ վերջին 10 տարիների ընթացքում նրա հետ ունեցել է մտերիմ բարեկամական, ընկերական հարաբերություններ: 

ՀՀ քրեական դատավարության օրենսգրքի 88-րդ հոդվածի 2-րդ մասից հետևում է, որ դատավորը, ում հայտնի է քրեական դատավարությանն իր մասնակցությունը բացառող հանգամանքներ, պարտավոր է դրանց մասին հայտնել դատավարության շահագրգռված մասնակիցներին, իսկ այն դեպքում, երբ կասկածում է իր մասնակցությամբ գործի նորմալ քննության հնարավորությանը պետք է հայտնի ինքնաբացարկ:

Հղում կատարելով «Հայաստանի Հանրապետության դատական օրենսգիրք» ՀՀ սահմանադրական օրենքի 71-րդ հոդվածին՝ Բալայանը նշել է, որ դատավորը պարտավոր է ինքնաբացարկ հայտնել, եթե նա տեղյակ է այնպիսի հանգամանքների մասին, որոնք անկողմնակալ դիտորդի մոտ կարող են ողջամիտ կասկած հարուցել տվյալ գործով նրա անաչառության մեջ: Ինքնաբացարկի հիմքերը ներառում են, ի թիվս այլնի, այն դեպքերը, երբ դատավորը կանխակալ վերաբերմունք ունի որպես կողմ հանդես եկող անձի, նրա ներկայացուցչի, փաստաբանի, դատավարության այլ մասնակիցների նկատմամբ:

«Տվյալ դեպքում կողմնակալ վերաբերմունք ունեմ մեղադրյալ Լյովա Բաղդասարյանի նկատմամբ և որպես դատավոր չեմ կարող լինել անաչառ ու գործով իրականացնել անկողմնակալ քննություն:Նկատի ունենալով վերոգրյալը գտնում եմ, որ սույն գործով պարտավոր եմ հայտնել ինքնաբացարկ»,- գրել է Դավիթ Բալայանը:

Ապրիլի 20-ին մակագրվել է Երևանի ընդհանուր իրավասության դատարանի դատավոր Մեսրոպ Մակյանին:
Նշենք, որ սույն գործով Լյովա Բաղդասարյանից բացի մեղադրյալի կարգավիճակում են Հայկ Կարապետյանը, ով մեղադրվում է Լյովա Բաղդասարյանին կաշառք տալու մեջ և Արթուր Հովհաննիսյանը, ով մեղադրվում է կաշառք տալուն օժանդակելու մեջ:

Լյովա Բաղդասարյանին մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասով, ՀՀ ՔՕ 314-րդ հոդվածի 1-ին մասով և նույն օրենսգրքի 179-րդ հոդվածի 1-ին մասի 3-րդ կետով՝ կաշառք ստանալու, պաշտոնատար անձի կողմից շահադիտական նպատակներով պաշտոնեական փաստաթղթերում ակնհայտ կեղծ տեղեկատվություն ներառելու և առանձնապես խոշոր չափերով յուրացում կատարելու համար:

Հայկ Կարապետյանին մեղադրանք է առաջադրվել ՀՀ քրեական օրենսգրքի 312-րդ հոդվածի 2-րդ մասով՝ խոշոր չափերով կաշառք տալու համար, իսկ Արթուր Հովհաննիսյանին՝ ՀՀ քրեական օրենսգրքի 38-312-րդ հոդվածի 2-րդ մասով՝ խոշոր չափերով կաշառք տալուն օժանդակելու համար:

Ըստ նախաքննական մարմնի՝ Լյովա Բաղդասարյանը մեղադրվում է քրեակատարողական հիմնարկում ազատազրկման ձևով պատիժ կրող դատապարտյալների օգտին ակնհայտ ապօրինի անգործության , այն է՝ ռեժիմի խախտման դեպքերը չարձանագրելու, շրջանառությունն արգելված իրեր հայտնաբերելուն ուղղված միջոցառումներ չիրականացնելու, որոշ դատապարտյալների համար արտոնյալ պայմաններ ստեղծելու համար, քրեական հեղինակություն վայելող այսպես կոչված՝ զոն նայող դատապարտյալ Հայկ Կարապետյանի, ինչպես նաև քրեական հեղինակություն վայելող Արսեն Հովհաննիսյանի կազմակերպմամբ հավաքագրված գումարներից՝ ՀՀ ԱՆ «Կոշ» ՔԿ հիմնարկի նախկին դատապարտյալ Արթուր Հովհաննիսյանի միջոցով, 2019թ․ սեպտեմբերի 17-ին Երևան քաղաքի Նորք-Մարաշ վարչական շրջանի Արմենակյան փողոցի 197 հասցեում գործող ավտոլվացման կետում ստացել է խոշոր չափերով՝ 700,000 ՀՀ դրամ կաշառք, որից հետո բռնվել է ՀՀ ԱԱԾ աշխատակիցների կողմից։

Նշենք, որ գործով մյուս մեղադրյալ Հայկ Կարապետյանը դատապարտված է եղել սպանության և ապօրինի զենք-զինամթերք կրելու համար և համարվում է քրեական հեղինակություն կամ ինչպես ասում են՝ զոն նայող դատապարտյալ: Վերջինս, ըստ մեղադրանքի, իր և նշված հիմնարկում ազատազրկման ձևով պատիժ կրող դատապարտյալների օգտին ակնհայտ ապօրինի անգործության, այն է՝ ռեժիմի խախտման դեպքերը չարձանագրելու, շրջանառությունն արգելված իրեր հայտնաբերելուն ուղղված միջոցառումներ չիրականացնելու, որոշ դատապարտյալների համար արտոնյալ պայմաններ ստեղծելու համար, իր և այլոց կազմակերպմամբ հավաքագրված գումարներից նախկին դատապարտյալ Արթուր Հովհաննիսյանի միջոցով ստացել է խոշոր չափերով՝ 700,000 ՀՀ դրամ կաշառք է տվել վերը նշված քրեակատարողական հիմնարկի պետ Լյովա Բաղդասարյանին։

Հեղինակ՝ Իզաբել Սահակյան

Աղբյուր` Փաստինֆո