Փաստ ինֆո

«Դոն Պիպո» մականունով հայտնի Արթուր Ասատրյանն ինքնիրավչության համար առաջադրված մեղադրանքը չի ընդունում: Այս մասին «Փաստինֆո»-ի հետ զրույցում ասաց Արթուր Ասատրյանի փաստաբան Մկրտիչ Վասակյանը:

«Առաջադրված մեղադրանքն անհիմն է: Որևէ ինքնիրավչության մասին խոսք լինել չի կարող»,- ասաց նա:

Փաստաբանը տեղեկացրեց, որ նոր գործն առնչվում է քենակալի հետ, որն Ասատրյանից առանձնապես խոշոր չափերի գումար է հափշտակել։

Փաստաբանի փոխանցմամբ՝ խոսքը գնում է մոտ 1 մլն 300 հազար ԱՄՆ դոլարի մասին, որը խարդախության ճանապարհով հափշտակվել է և դրա վերաբերյալ ևս նախաքննություն է ընթանում: Այդ հափշտակության գործով Արթուր Ասատրյանը և նրա հայրը՝ Օնիկ Ասատրյանը տուժող են ճանաչվել:

«Ստացվում է, որ իրեն խաբում են, բայց դրա համար իրեն են «դատում»»,- ասաց փաստաբանը՝ նշելով, որ ենթադրյալ ինքնիրավչությունը խաղողի այգիներում կատարված բերքահավաքն է, որը «կատարվել է օրինական կարգով»: «Հաղորդում են ներկայացրել ոստիկանություն՝ իբրև ինքնիրավչություն է:

Որևէ ինքնիրավչության մասին խոսք գնալ չի կարող: Հույս ունեմ, որ օբյեկտիվ և բազմակողմանի քննության արդյունքում կգտնեն, որ Արթուր Ասատրյանի կողմից կատարված որևէ ինքնիրավչություն չկա»,- ասաց փաստաբանը:

Ավելի վաղ տեղեկացրել ենք, որ Արթուր Ասատրյանին մեղադրանք է առաջադրվել ՀՀ քրեական օրենսգրքի 322-րդ հոդվածի 2-րդ մասով՝ բռնություն գործադրելով կամ դրա սպառնալիքով ինքնիրավչության համար:

2019թ քաղաքացին ոստիկանություն գրավոր բողոք է ներկայացրել առ այն, որ Օնիկ Ասատրյանն ապօրինաբար հավաքում է իրեն պատկանող այգու բերքը:

Հեղինակ՝ Իզաբել Սահակյան

Աղբյուր` Փաստինֆո