Փաստ ինֆո

Զիջումների կամ փոխզիջումների մասին խոսք լինել չի կարող, մինչև չընդունվի Արցախի դե յուրե անկախությունը, դրանից հետո Արցախը յուրաքանչյուր հարց ում հետ ուզում է կարող է քննարկել: «Փաստինֆո»-ի հետ զրույցում ասաց ԱԺ «Բարգավաճ Հայաստան» խմբակցության քարտուղար Արման Աբովյանը՝ անդրադառնալով Ռուսաստանի Դաշնության Արտաքին գործերի նախարար Սերգեյ Լավրովի հայտարարությանն, ըստ որի՝ բանակցային սեղանին մի փաստաթուղթ է, որը ենթադրում է ԼՂ հակամարտության կարգավորման փուլային տարբերակը:

«Այս հայտարարությունը փաստացի ոչ թե Ռուսաստանի արտաքին գործերի նախարարի կողմից էր, այլ հայտարարություն էր մոդերատոր երկրներից մեկի, Մինսկի խմբի համանախագահների կողմից»,-ասաց ԲՀԿ քարտուղարը:

Նա ընդգծեց, որ մինչ այսօր միշտ քննարկվել է հարցը, թե ինչի շուրջ ենք բանակցում, բայց պատկան մարմինները հարցադրումներին ի պատասխան միշտ ասել են՝ նորմալ է ամեն ինչ, բանակցային գործընթաց է կամ կոպիտ ասած՝ հանգիստ նստեք տեղներդ:

«Բայց արի ու տես, որ ինչ-որ տարածքների հարց է առաջ քաշվում, փուլային տարբերակ է քննարկվում: Սա ոչ թե համանախագահների կամ էլ կողմերից մեկի մեղավորությունն է, այլ այլևս փաստ է, որը հնչեցրել է համանախագահներից մեկը»,-ասաց Արման Աբովյանը:

Նրա գնահատմամբ, հայկական դիվանագիտության ամբողջ ներուժը պետք է ներգրավվի Արցախի դե ֆակտո անկախությունը դե յուրե դարձնելուն:

«Մենք՝ «Բարգավաճ Հայաստան» կուսակցությունը, Գագիկ Ծառուկյանը բազմաթիվ անգամ նշել ենք միակ ընդունելի և ճիշտ բանաձևը: Դա հետևյալն է՝ Արցախի հանրապետությունը դե ֆակտո անկախ, ժողովրդավարական պետություն է և հայկական դիվանագիտության ամբողջ ներուժը պետք է նետվի դե ֆակտո անկախությունը դե յուրե դարձնելուն: Մնացած բոլոր հարցերը որոնք հետո ծագելու են իրավասու են քննարկվել դե յուրե լեգիտիմիզացված, անկախ Արցախի հանրապետության կողմից»,-ասաց Աբովյանը ու շեշտեց, որ գոյություն ունի խնդիրների առաջնահերթություն:

Հեղինակ՝ Սոնա Գեւորգյան

Աղբյուր` Փաստինֆո