Փաստ ինֆո

Ուսանողներին աջակցություն ցուցաբերելու համար թիրախային խումբը սխալ է ընտրված: «Փաստինֆո»-ի հետ զրույցում ասաց Երևանի պետական համալսարանի Ուսանողական խորհրդի նախագահ Դավիթ Ափոյանը՝ անդրադառնալով Կառավարության կողմից ներկայացված հակաճգնաժամային 14-րդ միջոցառմանը, որի շրջանակներում աջակցություն կցուցաբերվի ուսանողներին:

Նշենք, որ ծրագրով նախատեսվում է, որ պետական բուհերի առկա համակարգի բակալավրիատի, մագիստրատուրայի եւ օրդինատուրայի 90 եւ ավել ՄՈԳ ունեցող եւ ավարտական կուրսում գտնվող ուսանողների կիսամյակի ուսման վարձերը կվճարվեն կառավարության կողմից՝ 100 տոկոսով։ 90 եւ ավելի ՄՈԳ ունեցող ոչ ավարտական կուրսերի ուսանողների կիսամյակային ուսման վարձերը կվճարվեն 75 տոկոսով։ Ավարտող ուսանողները, ովքեր ուսվարձի պարտք չունեն, կարող են հրաժարվել աջակցությունից կամ ստանալ գումարը՝ եթե այն վճարվել է ֆիզիկական անձի կողմից։ Իսկ եթե ավարտող ուսանողի վարձը վճարվել է ուսանողական վարկի միջոցով, գումարը կուղղվի վարկի սպասարկմանը։ Այսպիսի գումարները կօգտագործվեն այլ ուսանողների վարկավորելու համար։ Ուսանողական վարկերի տրամադրման ընթացակարգը կպարզեցվի։ 80-ից բարձր ՄՈԳ ունեցող ուսանողների գործող եւ նոր տրվող վարկերի տոկոսները 2020 թվականի համար կզրոյացվեն՝ այդ թվում պետության կողմից հավատարմագրում ունեցող բուհերի ուսանող

Ափոյանի գնահատմամբ նախագծում մի շարք խնդրահարույց կետեր կան, որոնցից է 90 ՄՈԳ-ի չափորոշիչը, քանի որ Երևանի պետական համալսարանի ուսանողները գնահատվում են 20 բալանոց համակարգով:

«90 ՄՈԳ ասվածը հարաբերական է, քանի որ երբ պարզ մաթեմատիկական հաշվարկ ենք անում, ապա 100 բալանոց համակարգի 90 միավորը հավասար է 20 բալանոց համակարգի 18 միավորին, սակայն օրինակ Պոլիտեխնիկական համալսարանի համակարգի գնահատման համաձայն 90 բալը հավասար է 19 միավորի: Ուստի հստակ չէ խոսքը 19, թե՞ 18 բալի մասին է»,-ասաց ԵՊՀ ՈՒԽ նախագահը:

Նա նաև արձանագրեց, որ 19 ՄՈԳ ունեցող ուսանողների զգալի մասն արդեն իսկ անվճար է սովորում, կամ էլ օգտվում է տարբեր բարեգործական ծրագրերից, որոնք փոխհատուցում են ուսանողի ուսման վարձը:

«Եթե համարենք, որ 80 միավորը նույն 19 միավորն է, ապա 19 միավոր ունեցող ուսանողները կամ անվճար են սովորում, կամ մեծամասամբ օգտվում են դրամական փոխանցումներ իրականացնող կազմակերպություններից, բարեգործական կազմակերպությունների օգնություններից»,-ասաց Ափոյանը ու շեշտեց, որ իհարկե 19 ՄՈԳ ունեցող ուսանողներ կան, որոնք նույնպես ուսման վարձի փոխհատուցման կարիք ունեն, բայց հիմնական մասը նման խնդիր չունի:

Նա նաև տեղեկացրեց, որ բակալավրի վճարովի համակարգում սովորում է 7839 ուսանող, իսկ անվճար համակարգում՝ 1520-ից 1530 ուսանող, անվճար են սովորում բարձր ՄՈԳ ունեցող (հիմնականում 18, 19, 20) ուսանողները, թեպետ բնագիտական ուղղվածությունում միջին առաջադիմություն ունեցող ուսանողներ են ու նրանք անվճար են սովորում:

Մեր զրուցակիցն ընդգծեց, որ ՈՒԽ-ի՝ ուսանողներին աջակցություն տրամադրելու, հորդորի հիմքում ընկած էր, որ պետք է աջակցություն տրամադրվի այն ուսանողներին, ովքեր դրա կարիքն ունեն, բայց փաստացի տվյալ որոշմամբ այդ ուսանողների կարիքները չեն լուծվում:

«Ճիշտ է, լուծում տալիս ենք, ընդառաջում ենք բարձր առաջադիմություն ունեցող ուսանողներին, շատ ուրախ եմ, որ Կառավարության ուշադրության կենտրոնում են այդ ուսանողները, բայց տվյալ խնդրի լուծման համար խումբը սխալ է ընտրված, պետք է աջակցել այն ուսանողներին, ովքեր դրա կարիքն ունեն, չեն կարողանում իրենց վարձը վճարել: Ես հասկանում եմ, որ այդ անձանց առանձնացնելը շատ դժվար է, դժվար է հասկանալ՝ ովքեր իրոք դրա կարիքն ունեն և ովքեր են առիթից օգտվում, ուստի մենք առաջարկեցինք, որպեսզի բոլորին փոխհատուցում տրամադրվի թեկուզ 50 հազար դրամի չափով, կարծում եմ, որ սա համեմատության կարգով այնքան էլ մեծ գումար չէ»,-նշեց Ափոյանը:

«Փաստինֆո»-ն զրուցեց նաև ԱԺ «Իմ քայլը» խմբակցության պատգամավոր Հովհաննես Հովհաննիսյանի հետ, ով տեղեկացրեց, որ հանձնաժողովների անդամների կողմից Կառավարությանը առաջարկներ են ուղարկվել ուսանողներին աջակցություն տրամադրելու փաթեթի վերաբերյալ:

Նշենք նաև, որ այսօր հրավիրված ասուլիսում վարչապետի օգնական Նաիրի Սարգսյանը նշել է, որ ծրագիր կա, ըստ որի ուսանողներին վարկեր են տրվելու՝ անկախ նրանց առաջադիմության մակարդակից կամ բուհ-ի կարգավիճակից. «Նրանք, ովքեր 80 և ավելի ՄՈԳ ունեն անտոկոս վարկեր ստանալու հնարավորություն կունենան, իսկ նրանք, ովքեր ցածր առաջադիմությամբ են սովորում տարեկան 5 տոկոսով վարկ կստանան»:

Հեղինակ՝ Սոնա Գեւորգյան

Աղբյուր` Փաստինֆո