Փաստ ինֆո

ՀՀ-ում հաստատվել է աջակցության 14 ծրագիր ծայրահեղ բարդ ընթացակարգերով: Այս մասին ԱԺ ճեպազրույցի ժամանակ ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

Վերջինս ընդգծեց այդ ծրագրերի փոխարեն պետք է լինեին երկու` մեկ տնտեսական և մեկ սոցիալական ծրագրեր, և պետք է տրամադրվեր ՀՆԱ-ի մինչև 10 տոկոսի չափով աջակցություն. «Կա ընկերություն, որ միլիարդավոր դրամների հարկ է վճարում, 150 հազար դրամի ուշացում ունի, և այս չափանիշներով այլևս բարեխիղճ հարկատու չի համարվում ու չի կարողանում անտոկոս վարկից օգտվել»,-ասաց Էդմոն Մարուքյանը:

Պատգամավորի կարծիքով սոցիալական աջակցության ծրագրերն ուշացած են և բոլոր կարիքավորներին չեն վերաբերում. «Օրավարձով աշխատող և վարձով բնակվողների համար որևէ բան արվե՞լ է: Կամ արտագնա աշխատողների համար, ովքեր անդադար գումար են ուղարկել Հայաստան: Կան գյուղեր, որ ամբողջությամբ արտագնա աշխատանքով են ապրել, իսկ հիմա այդ գյուղերում մարդիկ տանը նստած են, ինչ պետք է անեն: Անհասկանալի իրավիճակ է»,-նշեց Էդմոն Մարուքյանը:

Նա նշեց, որ որևէ երկրում աջակցության 14 ծրագիր չկա, քանի որ պատգամավորի խոսքով դրա իմաստը չկա. «Հիմա էլ ուշ չէ, որ իրավիճակի դրամատիզմին համահունչ աջակցություն տրամադրվի, այլապես սա բերելու է տնտեսական և սոցիալական մեծ կոլապսի: Մենք անդադար լոբբինգ ենք արել, որ ադեկվատ ծրագրեր բերվեն, որ որևէ ունևոր աջակցություն չստանա, այնպիսի չափանիշներ են մշակվում, որ բազմաթիվ կարիքավորներ ևս աջակցություն չեն ստանում»,-հավելեց Էդմոն Մարուքյանը:

Աղբյուր` Փաստինֆո