Փաստ ինֆո

ՀՀ վարչապետ Նիկոլ Փաշինյանն այսօրվա ուղիղ եթերում թվարկել է այն խմբերին, որոնք, ըստ նրա, հեղափոխությունից հետո հիասթափություն են ունեցել։ Դրանք են՝ քաղաքական կրիմինալները, կոռուպցիոներները, քաղաքական ուժերը, որոնք նախկին իշխանության հետ ապագայի հետ կապված պլաններ ունեին, արևմտամետները, որ մտածում էին, թե «մերոնք եկան իշխանության», ռուսամետները, օլիգարխիան, լրատվամիջոցները, որոնք զրկվել են ֆինանսավորման աղբյուրներից և այլն:

«Կա նաև ինձ համար հարգելի ընդդիմադիր քաղաքական ուժերի մի հատված, որը նույնպես հիասթափվելու շատ պատճառներ ունի: Քաղաքական ուժերը երկար տարիներ հետևողականորեն զարգացրել են մի ասելիք, բայց հեղափոխության արդյունքում զրկվել են քաղաքական ասելիքից ու հիասթափության լեգիտիմ պատճառ ունեն»,-այս մասին այսօր ֆեյսբուքյան ուղիղ եթերում ասաց ՀՀ վարչապետը:

Նա ընդգծել է, որ պայմանականորեն ասած հոգևորականությունը նույնպես հիասթափվելու պատճառ ունի. «Հայաստանում որքան ընդգծվում է գաղափարական իշխանության գոյության փաստը, այնքան ավելի ակնհայտ է դառնում Հայաստանում հոգևոր կյանքի սակավությունը: Այսինքն՝ ինչքան Հայաստանում իշխանությունը փորձում է արժեքներ սերմանել, այդքան ակնհայտ է դառնում, որ հոգևորականությունն արժեքների ու գաղափարների սերմանման արդյունքում մեծ բացեր ու խնդիրներ ունի, հետևաբար դա հոգևորականության համար լրջագույն հիասթափություն է առաջացնում»:

Նա նշեց, որ հաճախ ինքն իրեն հարցնում է արդյոք այսօրվա մեր հոգևոր կյանքը մեզ մոտեցնում է Աստվածաշնչյան գաղափարներին, ապա հասկանում՝ վստահ չէ, որ այդ հարցին կարող է դրական պատասխան տալ:

Մանրամասները՝ տեսանյութում։

Աղբյուր` Փաստինֆո