Փաստ ինֆո

Գլխավոր դատախազության վարչություններից մեկի աշխատակիցների շրջանում կորոնավիրուսի վարակման դեպք է արձանագրվել: «Փաստինֆո»-ի հետ զրույցում Դատախազության Հանրային կապերի բաժնի պետ Արևիկ Խաչատրյանն ասաց, որ դատախազի վիճակը լավ է, նրա մոտ ջերմություն և այլ ախտանշաններ առկա չեն եղել:

Խաչատրյանը տեղեկացրեց, որ դատախազի հետ շփման շրջանակը պարզված է, ընտանիքի անդամները մեկուսացվել են, իսկ նրա հետ շփումներ ունեցած գործընկերներն ինքնամեկուսացման մեջ են: Նրանց մոտ համապատասխան հիվանդության կլինիկա ունենալու վերաբերյալ տվյալներ, ըստ նրա, առայժմ չկան, սակայն ախտանշանների ի հայտ գալու դեպքում անմիջապես միջոցներ կձեռնարկվեն՝ թեստավորման համար:

Արևիկ Խաչատրյանն ընդգծեց, որ գլխավոր դատախազությունում միջոցներ են ձեռնարկվում աշխատակիցների շրջանում կորոնավիրուսի տարածումը կանխելու համար:

Նրա փոխանցմամբ՝ տևական ժամանակ է, աշխատակիցների մեծ մասը, այդ թվում՝ դատախազները, աշխատանքային գործունությունն իրականացնում են բնակության կամ փաստացի գտնվելու վայրում՝ ինքնամեկուսացման պայմաններում, իսկ աշխատանքի հաճախող բոլոր աշխատակիցները պարտադիր ամեն օր ջերմաչափվում են, դատախազության վարչական շենքերում պարբերաբար ախտահանման աշխատանքներ են իրականացվում:

«Վերջին անգամ կրկնակի ախտահանում իրականացվել է այս շաբաթ և կիրակի օրերին: Բացի այդ՝ բոլոր աշխատակիցները, աշխատասենյակներն ապահովված են ալկոգելներով կամ այլ ախտահանիչ միջոցներով»,- նշեց Խաչատրյանը:

Աղբյուր` Փաստինֆո