Փաստ ինֆո

Կորոնավիրուսի հետևանքով մեր երկրի տնտեսական համակարգը կանգնած է փլուզման եզրին և հետկորոնավիրուսյան Հայաստանում իսկապես լինելու են լրջագույն դժվարություններ` տնտեսական կյանքը գոնե մինչկորոնավիրուսյան իրավիճակը վերականգնելու համար: Այս մասին «Փաստինֆո»-ի հետ զրույցում ասաց փաստաբան Նորայր Նորիկյանը: 

Նրա խոսքով՝ բնականոն կյանքին վերադառնալու խնդիրն օր օրի դառնում է հրամայական:

Դիտարկմանը, թե արդյո՞ք դա նշանակում է, որ չպետք է կարանտին հայտարարվեր` Նորիկյանն արձագանքեց. «Ես էլ եմ ունեցել որոշակի մտավախություններ և վերապահումներ արտակարգ դրություն հայտարարելու հետ կապված այն խորը համոզմունքով, որ իրավական այլ գործիքակազմեր կային, մասնավորապես՝ «Պետական սահմանի մասին» օրենքի 16-րդ հոդվածը հստակ սահմանում է, որ համաճարակի ներթափանցման պայմաններում պետությունը պարտավոր է այդ համաճարակի ներթափանցումը ՀՀ թույլ չտա, ավելին՝ ստեղծի կարանտինային իրավիճակ»:

Փաստաբանի կարծիքով` երկրում իսկապես ստեղծվել է արտակարգ իրավիճակ, համաճարակով պայմանավորված ստեղծվել է յուրաքանչյուրի կյանքին սպառնացող միջավայր, որտեղ պետական բոլոր մարմինները պետք է բերվեին արտակարգ իրավիճակների կառավարման կարգավիճակի: Մինչդեռ, մեր պետական մարմինների մեծամասնությունը՝ մարզպետարանները, համայնքների, վարչական շրջանների ղեկավարները, գյուղապետերը որևէ ձևով կամ ոչ բավարար չափով են ներգրավված արտակարգ դրության պայմաններում իրենց առջև դրված խնդիրների կատարմանը, ավելին՝ պարետատան ոչ բոլոր որոշումներն են կատարվել:

«Եթե պետական կառավարման մարմինը, պետական ինստիտուտն ընդունում է մի որոշում և այդ որոշումը չի կատարվում, կիրառման ոլորտում ունի խնդիր, անկախ նրանից՝ ում կողմից չի կատարվում կամ անհրաժեշտ մակարդակով չի կատարվում, այդ ընդունված որոշումն արժեզրկվում է, գրոշի արժեք չի ունենում »,- ասաց Նորիկյանը, ապա հավելեց. «Այն մարմինները, որոնք չեն կատարում կամ չեն ապահովում պարետի որոշումների անխափան կիրառումը, այդտեղ խնդիր ունենք մենք: դա կլինի՝ Ոստիկանություն, Առողջապահության նախարարություն...»:

Նորիկյանը նշեց, որ հանրության ստվար մասը առաջնորդվում է ոչ թե օրենքներով, իրավական ակտերով, այլ՝ պետության առաջնորդի այս կամ այն օրվա տրամադրությամբ և հրապարակված կարծիքով, բայց դա արդեն այլ օպերայից է:

«Ես չեմ նախանձում Փաշինյանին, եթե անկեղծ ասեմ: Բնականաբար նա չի կարող անընդհատ դուրս գալ եթեր և ասել՝ վայ, մեր վիճակը սարսափելի է և այլն: Մի կողմից սա է խնդիրը, մյուս կողմից էլ՝ իրականությունից կտրվելու խնդիր կա: Բոլոր դեպքերում՝ հանրությանը պետք է տրամադրվի սպառիչ, օբյեկտիվ, բոլոր շահագրգիռ գերատեսչություններով անցած, ֆիլտրված տեղեկատվություն»,- ասաց Նորիկյանը:

Ըստ Նորիկյանի՝ ողջամիտ բացատրություն չի բերվել, թե ինչու պետք է սննդի խանութի աշխատակիցն աշխատի, իսկ մնացած ձեռնակատիրական գործունեություն իրականացնողները՝ ոչ:
Անդրադառնալով տեքստիլ գործունեությանը, որտեղ եղել է հենց կորոնավիրուսի վարակման օջախներից մեկը՝ Նորիկյանն ասաց, որ, եթե ի սկզբանե գլխատվեր վարակի և հենց այդ հայտնի գործարարի գործարանը հայտարարվեր աղետի գոտի, ապա կորոնավիրուսի նման մեծ ծավալի դեպքեր չէին արձանագրվի:

Աղբյուր` Փաստինֆո