Փաստ ինֆո

Պաշտպանական կողմը պատշաճ ձևով չի ծանուցվել ՀՀ երկրորդ նախագահ Ռոբերտ Քոչարյանի և մյուսների գործով դատական նիստի օրը մայիսի 8-ին նշանակվելու մասին: Ռոբերտ Քոչարյանի պաշտպանական խմբի անդամ Հայկ Ալումյանը «Փաստինֆո»-ի հետ զրույցում արձանագրեց, որ բանավոր աղբյուրներից ստացված տեղեկատվությունը չի կարելի համարել պատշաճ ծանուցում և նման ձևով մարդկանց տեղեկացնելը համարում է անընդունելի և ամոթալի: 

«Ես չունեմ պաշտոնական որևէ տեղեկություն, թե դատական նիստը քանի օրով է հետաձգվել և երբ է նշանակված հաջորդ դատական նիստը: Ես ունեմ բանավոր աղբյուրներից տեղեկություններ, որոնք չի կարելի համարել պատշաճ ծանուցում: Դատավորը մեզ խաշի չի հրավիրում, որպեսզի այդպիսի բանավոր հրավերները համարվեն պատշաճ: Նույնիսկ խաշի հրավիրելիս պահպանվում են ֆորմալ կողմերը, իսկ այս ձևով մարդկանց տեղեկացնելը, թե երբ է լինելու հաջորդ դատական նիստը, համարում եմ անընդունելի եւ ամոթալի: Հետևաբար ես չեմ կարող վստահ լինել, որ դատական նիստը նշանակված է մայիսի 8-ին»,- ասաց Ալումյանը:

Նրա խոսքով՝ ուրբաթ օրը դատավոր Աննա Դանիբեկյանը ներկայացել է աշխատանքի , բայց Ռոբերտ Քոչարյանի խափանման միջոցի վերաբերյալ հարցը չի քննել, թեև համապատասխան միջնորդությունները մուտքագրված են եղել մարտի 16-ին և մարտի 24-ին:
Նրա խոսքով՝ այս ամենի գլխավոր պատասխանատուն եղել է և կա Երևանի ընդհանուր իրավասության դատարանի նախագահ Արթուր Մկրտչյանը, ով ԲԴԽ որոշման համաձայն պարտավոր էր միջնորդությունների քննությունը փոխանցել մեկ այլ դատավորի՝ հաշվի առնելով, որ Աննա Դանիբեկյանի կողմից այդ միջնորդությունների քննությունը կարճ ժամկետում անհնարին էր: Ալումյանը գտնում է, որ վաղ, թե ուշ Երևանի ընդհանուր իրավասության դատարանի նախագահը կենթարկվի պատասխանատվության՝ կլինի քրեական, թե կարգապահական պատասխանատվության տեսքով:

Ավելի վաղ տեղեկացրել ենք, որ մարտի 17-ին նշանակված Ռոբերտ Քոչարյանի և մյուսների գործով դատական նիստը հետաձգվել էր՝ դատավորի վատառողջ լինելու պատճառաբանությամբ: Իսկ դրանից մեկ օր առաջ՝ մարտի 16-ի երեկոյան, պաշտպանները Ռոբերտ Քոչարյանին անձնական երաշխավորությամբ ազատ արձակելու մասին միջնորդություն էին ներկայացրել դատարան։ Ընդ որում՝ նախապես ճշտել էին դատարանից, որ նշանակված նիստը կայանալու է , բայց չի կայացել։ Հետագայում պարզվեց, որ Աննա Դանիբեկյանն անաշխատունակության թերթիկ է վերցրել մարտի 13-ից մինչեւ ապրիլի 16-ը, որի ընթացքում պետպատվերի շրջանակներում քթի վիրահատություն է արել։ Անաշխատունակության ժամկետը լրանալուց հետո էլ՝ ապրիլի 17-ին հայտնի դարձավ, որ դատավորը հիմա էլ հերթական արձակուրդ է վերցրել մինչեւ մայիսի 7-ը։

Հեղինակ՝ Իզաբել Սահակյան

Աղբյուր` Փաստինֆո