Փաստ ինֆո

80-ամյա Սմովիկ Ասլիկյանի մահվանից երկու ամիս անց Վճռաբեկ դատարանը բավարարել է հայցվորի բողոքը և ճանաչել է նրա գույքային սեփականության իրավունքը՝ 22 տարվա պայքարից հետո: Այս մասին «Փաստինֆո»-ն տեղեկացավ հայցվորի փաստաբան Լուսինե Վիրաբյանից:

«1998թ.-ին իմ վստահորդը սույն գործով պատասխանողին գումար է տվել, որի նպատակն ի սկզբանե բնակարանի գնումն էր, սակայն այդ ժամանակ քաղաքացիների միջև ընդունված էր ներքին առք ու վաճառք կոչվող ժողովրդական գործարքը, նոտարական վավերացում չի իրականացվել: Հետագայում արդեն, հասկանալով, որ բնակարանի սեփականատեր հենց այդպես պարտավորագրով չեն դառնում, պատասխանող կողմը հրաժարվել է գնալ նոտար: Ի սկզբանե դա եղել է որպես պարտավորագիր՝ ես հանձնում եմ Ձեզ 5000 դոլար, որի դիմաց պարտավորվում եք բնակարանը հանձնել ինձ»,- ասաց Վիրաբյանը:

Նրա փոխանցմամբ ՝ դատական գործընթացը սկսվել է դեռևս 2000 թվականին և եղել են մի քանի դատական գործեր, որոնց ընթացքում մահացել են պատասխանող և՛ Վաչագան Մուրադյանը, և՛ նրա դուստրը՝ Նաթելլա Մուրադյանը, որոնց միջև կնքված է եղել պարտավորագիրը:

2014թ.-ին հայց են ներկայացրել ընդդեմ Վաչագան Մուրադյանի մյուս դստեր՝ Սուսան Մուրադյանի, որը սեփականության առաջնորդ է և իրավահաջորդ՝ ձեռքբերման վաղեմության ուժով սեփականության իրավունքը ճանաչելու: Ներկայացված հայցին ի պատասխան պատասխանող կողմը հակընդդեմ հայց է ներկայացրել՝ վտարման պահանջով: Երևանի ընդհանուր իրավասության դատարանը բավարարել է վաղեմության ուժով սեփականության իրավունքը ճանաչելու մասին հայցը և միևնույն ժամանակ մերժել Սմովիկ Ասլիկյանին վտարելու մասին պատասխանողի հայցը: Վիրաբյանը հայտնեց, որ հակընդդեմ հայցվորը վերաքննիչ բողոք է ներկայացրել դատարանի որոշման դեմ, ինչը մասամբ է բավարարվել։

Այն է՝ Վերաքննիչ քաղաքացիական դատարանը մերժել է Սմովիկ Ասլիկյանի ՝ վաղեմության ուժով գույքի սեփականության իրավունքը ճանաչելու հայցը, իսկ նրան վտարելու պահանջի վերաբերյալ հայցն ուղարկել Առաջին ատյանի դատարան՝ նոր քննության:
Լուսինե Վիրաբյանը Վերաքննիչ դատարանի որոշումն ապօրինի որակեց և նշեց, որ վտանգավոր կլիներ, եթե որոշումն այդպես մնար և դառնար նախադեպ:

Հայցվոր կողմը վերաքննիչ դատարանի որոշման դեմ վճռաբեկ բողոք է ներկայացրել, ինչը բավարարվել է: Վիրաբյանի խոսքով՝ Վճռաբեկ դատարանը շատ կարևոր որոշում է ընդունել՝ ևս մեկ անգամ հաստատելով նախկինում կայացված նախադեպային որոշումներով կարծիքը:

«Անդրադարձ է կատարվել նաև վկաների ինստիտուտին, քանի որ վերաքննիչ դատարանն ասել էր՝այն, որ վկաները եկել են, վկայություն են տվել, որ նրանք տեղյակ են, այն, որ կա բաժանորդային վճարումների անդորրագրերի փաստը, որը վկայում է, որ այս մարդիկ իսկապես տիրապետել են որպես սեփական գույք, դա դեռ չի նշանակում, որ մարդ կարող էր լինել սեփականատեր: Ուղղակի աբսուրդի ժանրից էր վերաքննիչ դատարանի որոշումը»,- ասաց Վիրաբյանը՝ հավելելով, որ իր վստահորդի իրավահաջորդների հետ քննարկվում է նաև Վերաքննիչ դատարանի դատավորին կարգապահական պատասխանատվության ենթարկելու համար դիմում ներկայացնելու հարցը:

Փաստաբանի խոսքով՝ վերջին 22 տարիների ընթացքում իր վստահորդի ընտանիքն ուղղակի քայքայվել է, թե՛ ֆիզիկապես, թե՛ հոգեպես, քանի որ պատասխանողները հայցը ներկայացնելուց հետո պարբերաբար անհանգստացրել են՝ ոչ օրինական ձևերով;

«Իրենց տան մեջ անգամ ծեծել են, թե հայցվորին, թե հայցվորի կնոջը:Այդ տարիքի անձնավորություններին, դուք պատկերացնում եք ինչ խայտառակության մասին է խոսքը: Մենք, թե՛ հոգեբանորեն, թե՛ իրավական առումով շատ դժվար գործի հետ գործ ունեինք, որովհետև այդքան էլ միանշանակ չէր պատասխանողի պահվածքը, թեև՝ ամեն ինչ ապահովված էր ապացույցներով և իրենք էլ պետք է հասկանային, որ ի վերջո 22 տարի առաջ իր հայրն արդեն իսկ առք ու վաճառք իրականացրել էր» ,- նշեց փաստաբանը:

Հեղինակ՝ Իզաբել Սահակյան

Աղբյուր` Փաստինֆո