Փաստ ինֆո

Սեռական և վերարտադրողական առողջության պահապանումը կախված է մի շարք գործոններից, որոնցից մեկն էլ սննդակարգն է:

Առաջին հերթին շատ կարևոր է ռացիոնալ սնվել, որը նշանակում է ՝ օգտագործել տարբեր տեսակի, սակայն չափավոր քանակի սննդամթերքներ, պահպանել դրանց օգտագործման հավասարակշռությունը, օգտագործել բավարար քանակության հեղուկներ (2-2.5 լիտր) և իհարկե զերծ մնալ սխալ դիետաներից:

Կան սննդամթերքներ, որոնց օգտագործումը բարձրացնում է սեռական և վերարտադրողական հնարավորությունները՝ նպաստելով որակյալ սեռական կյանքի երկարատև պահպանմանը:

Սեռական ակտիվությունը խթանող միջոցները կոչվում են աֆրոդիզիակներ:

Որո՞նք են այդ սննդամթերքները.

Ծովամթերքների ազդեցությունը սեռական առողջության վրա պայմանվորված է ֆոսֆորի, ցինկի և յոդի բարձր պարունակությամբ:

Բացի այդ, պարունակում են նաև ճարպաթթուներ(օմեգա 3,6), որոնք կարգավորում են ճարպային նութափոխանակությունը, կանխարգելում սիրտ-անոթային հիվանդությունների առաջացումը, կարգավորում հորմոնալ հավասարակշռությունը, նպաստում բջիջների վերականգմանը, դանդաղեցնում ծերացման գործընթացները:

Ցինկը և ֆոսֆորը հանդիսանում են սեռական հորմոնների կարևոր բաղադրիչներից, կարգավորում են տեստոստերոնի մակարդակը, որը տղամարդկանց և կանանց սեռական ցանկությունն (լիբիդո) ապահովող գլխավոր հորմոնն է:

Բացի այդ, ցինկը կարևոր նշանակություն ունի սպերմատոզոիդների որակական ցուցանիշների պահպանման համար: Հետևաբար, անբավարարությունը կարող է անպտղության պատճառ դառնալ:
Ֆոսֆոր պարունակող աֆրոդիզիակները բարձրացնում են ոչ միայն սեռական ցանկությունը, այլ նաև սեռական ակտիվությունը, էրեկցիային հասնելու և պահպանելու կարողությունը:

Յոդը վահանգեղձի հորմոնների բաղադրիչ է, որն անհրաժեշտ է դրանց սինթեզի համար: Վահանագեղձի հորմոններն անմիջական ազդեցություն ունեն սեռական և վերարտադրողական ֆունկցիայի վրա: Հետևաբար վանագեղձի հիվանդությունների ժամանակ կարող են առաջանալ սեռական ֆունցիայի խանգարումներ, անպտղություն և այլն:

Ծովամթերքներից իրենց օգտակարությամբ հատկապես աչքի են ընկնում ոստրենները:

Տարբեր տեսակի մսամթերքներ (տավարի/հավի միս առանց կաշվի և յուղի), որոնց մեջ պարունակվող կարնիտինն ու Լ-արգինինը լավացնում են օրգանզիմի նյութափախանակային գործընթացները և օրգանների արյունամատակարարումը: Իսկ սեռական օրգանների արյունամատակարարման լավացումը դրական ազդեցություն ունի սեռական ֆունկցիայի իրականացման համար:

Վիտամին E կամ սեքս վիտամին -համարվում է հակաօքսիդանտ, դանդաղեցնում է բջիջների ծերացումը, լավացնում օրգանների արյունամատակարարումը, սեռական գեղձերի աշխատանքը, ինչպես նաև մասնակցում սեռական հորմոնների սինթեզին:

Պարունակությունը բարձր է ՝

-ընդեղենների/ընկույզ, պնդուկ, նուշ, պիստակ/՝ թարմ վիճակում,
-բուսական յուղի,
-տարբեր տեսակի սերմերի (արևածաղիկ, կտավատ, քունջութ) մեջ և այլն:

B խմբի վիտամիններով հարուստ են հացահատիկները, որոնք օրգանիզմն ապահովում են էներգետիկ բալանսով, այդ թվում նաև սեռական էներգիայով:

Վիտամին D ապահովում է սեռական բջիջների աճն ու զարգացումը, ինչպես նաև բարձրացնում տեստոստերոնի պարունակությունը արյան մեջ: Քիչ քանակությամբ պարունակվում է ծովամթերքներում և կաթնամթերքներում:

Մրգեր և բանջարեղեններ

Մրգեր՝ նուռ, ելակ, դեղձ, բանան, անանաս, խնձոր, խաղող, սև հաղարջ, ցիտրուսներ:

Ելակը համարվում է ամենասեքսուալ միրգը: Այն լավացնում է արյունամատակարարումը, խթանում սպերմատոզորիդների արտադրությունը:

Նուռը մրգերի թագուհին է: Այն հարուստ է բազմաթիվ հանքանյութերով և վիտամիններով, բարձրացնում է օրգանիզմի դիմադրողականությունը, օգտակար է էրեկցիոն դիսֆունկցիայի դեպքում, ինչպես նաև օգնում է կանանց մոտ մեղմել դաշտանադադարի երևույթները:

Բանանը լավացնում է էրեկցիան, սպերմատոզոիդների որակը և վերարտադրողական ֆունկցիան:

Բանջարեղեններից խորհուրդ է տրվում ՝ սոխ, սխտոր, լոլիկ, կաղամբ, բազուկ, գազար, սունկ,սմբուկ, ծաղկակաղամբ, նեխուր, ռեհան:

Ընդհանուր առմամբ մրգերն ու բանջարեղենները հարուստ են վիտամիններով և հանքանյութերով, որոնք շատ օգտակար են օրգանզիմի համար: Սակայն չպետք է մոռանալ, որ չարաշահման դեպքում դրանք կարող են թողնել վնասակար ազդեցություն:

Մեղրը համարվում է ուժեղ աֆրոդիզիակ: Հարուստ է օգտակար նյութերով, լավացնում է նյութափոխանակային գործընթացները, նպաստում սեռական հորմոնների արտադրությանը՝ ազդելով սեռական ցանկության վրա: Հետևաբար մեղրը բարձրացնում է սեքսուալ էներգիան:

Շոկոլադը բնական հակադեպրեսանտ է: Այն խթանում է «ուրախության հորմոնների» ՝ դոֆամինի և սերոտոնինի արտադրությունը՝ բարձրացնելով տրամադրությունն ու սեռական ակտիվությունը:
Ցանկալի է նախապատվություն տալ դառը շոկոլադին:

Ինչ վերաբերվում է ալկոհոլային խմիչքներին, գոյություն ունի թյուր կարծիք, որ դրանց օգտագործումը բարձրացնում է սեռական ցանկությունը և խթանում սեռական ակտիվությունը: Ալկոհոլի օգտագործումը բացասաբար է անդրադառնում լյարդի ֆունկցիայի, սեռական հորմոնների արտադրության վրա, ինչպես նաև վնասում է նյարդային բջիջները: Խրոնիկ ալկոհոլամոլությունը կարող է սեռական անկարողության և անպտղության պատճառ դառնալ:

Ալկոհոլային խմիչքներից աֆրոդիզիակ է համարվում չափավոր քանակության կարմիր գինին, որը լավացնում է օրգանիզմի արյան շրջանառությունը, ինչպես նաև բարձրացնում սեռական ցանկությունը:

Սննդային ռացիոնում մեծացնելով այս սննդամթերքների օգտագործումը, կարող եք հնարավորինս երկար պահպանել սեռական և վերարտադրողական կյանքի լավ որակը:

Լուսինե Ստեփանյան
բժիշկ-սեքսոպաթոլոգ

Աղբյուր` Փաստինֆո