Փաստ ինֆո

Գեղարքունիքի մարզում ապրիլի լույս 17-ի գիշերը սպանություն է տեղի ունեցել՝ հրազենի գործադրմամբ: Ոստիկանությունից «Փաստինֆո»-ին հայտնեցին, որ ահազանգն ստացել են այսօր՝ ապրիլի 17-ին՝ ժամը 10:25-ին առ այն, որ Ծովագյուղ-Շորժա-Վարդենիս ավտոճանապարհին՝ Porsche Cayeene մակնիշի տրանզիտ համարանիշի ավտոմեքենայում տղամարդու դի կա:

«Մեկնել է օպերատիվ քննչական խումբ: Ձեռնարկված միջոցառումների արդյունքում պարզվել է, որ ժամը 00:00-ից մինչև ժամը 01:00-ն ընկած ժամանակահատվածում Ծովագյուղ-Շորժա-Վարդենիս ավտոճանապարհի 29-րդ կմ-ին Շողակաթ համայնքի մի բնակիչ՝ իր անվամբ հաշվառված որսորդական հրացանով, չպարզված հանգամանքներում կրակել է ավտոմեքենայի ուղղությամբ, ինչի հետևանքով վարորդը ստացած վնասվածքներից տեղում մահացել է: Նշված անձը հայտնաբերվել և բերման է ենթարկվել: Հանցագործության գործիք հանդիսացող հրացանը ներկայացվել է բաժին, նշանակված է դատաբժշկական փորձաքննություն, հարուցվել է քրեական գործ: Կատարվում է նախաքննություն»,-ասացին ոստիկանությունից:

«Փաստինֆո»-ի տեղեկություններով՝ սպանված 36-ամյա տղամարդը Երևան քաղաքի Նոր Նորք 9-րդ զանգվածի բնակիչ էր, իսկ սպանության կասկածանքով բերման ենթարկված 32-ամյա տղամարդը ՝ Գեղարքունիքի մարզի բնակիչ: Ընդ որում՝ սպանվածը և սպանության մեջ կասկածվողը ճանաչել են միմյանց, ունեցել են բարեկամական կապեր: Սպանությունից առաջ բարեկամները միասին հացկերույթի են մասնակցել, որի ժամանակ հնչել է հայհոյանք: Արդյունքում առաջացել է վիճաբանություն ու հացկերույթի սեղանից երբեմնի բարեկամները հեռացել են միմյանց վրա բարկացած, իսկ քիչ անց, երբ արդեն Երեւանի բնակիչը գտնվել է ավտոմեքենայում, հնչել է նաեւ կրակոց, որի գնդակը դիպել է վերջինիս պարանոցին։ Դրանից հետո կասկածյալը գնացել է տուն, քնել։

«Փաստինֆո»-ի տեղեկություններով՝ սպանության մեջ կասկածվող տղամարդն աշխատում է երկաթգծում որպես հերթապահ, իսկ սպանվածն արհեստավոր էր և մեքենաների նորոգմամբ:

Հեղինակ՝ Իզաբել Սահակյան

Աղբյուր` Փաստինֆո