Փաստ ինֆո

ՌԴ-ում ադրբեջանցու սպանության մեջ մեղադրվող Միսակ Լազարյանն ազատ է արձակվել կալանքից: Այս մասին «Փաստինֆո»-ին հայտնեց Դատախազության Հանրային կապերի բաժնի պետ Արևիկ Խաչատրյանը: 

Միսակ Լազարյանի փաստաբան Արկադյա Գևորգյանը «Փաստինֆո»-ի հետ զրույցում ասաց, որ հաշվի առնվել երկու հանգամանք: Նրա փոխանցմամբ` նոր քրեական գործ է հարուցվել, որի շրջանակներում Լազարյանին մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասի հատկանիշներով՝ փաստաթղթեր կեղծելու համար ու նրա նկատմամբ որպես խափանման միջոց է ընտրվել ստորագրությունը չհեռանալու մասին: Բացի այդ ՝ ապաստանի հարցով վարչական վարույթի առկայությունն արտահանձնումը բացառող հանգամանք է և անձը չի կարող գտնվել կալանքի տակ:

«Այս պահին վարչական վարույթը կասեցվել է՝ կապված կորոնավիրուսի հետ: Հաշվի առնելով նաև այս հանգամանքը, որ անժամկետ կասեցված է վարչական վարույթի ընթացքը, կալանքից ազատ են արձակել: Հաշվի առնելով նաև այն հանգամանքը, որ մեկ այլ քրեական գործի շրջանակներում որպես խափանման միջոց է ընտրվել ստորագրությունը չհեռանալու մասին, այսինքն՝ երկու խափանման միջոց միաժամանակ չի կարող կիրառվել, իսկ այս մյուս խափանման միջոցն էլ կարող է ապահովել նրա ներկայությունը»,- ասաց Գևորգյանը:

Փաստաբանի պարզաբանմամբ` օրենքի և կոնվենցիայի համաձայն՝ եթե մեր երկրում նոր քրեական գործ է հարուցվել այդ անձի նկատմամբ, ապա արտահանձնման գործընթացը ժամանակավորապես հետաձգվում է մինչև նախաքննությունն ավարտվի և, եթե պատիժ է նշանակվում, ապա պատժի կրման ժամկետն էլ ավարտվի և նոր միայն կարող է քննարկվել արտահանձնման գործընթացը:

Հիշեցնենք, որ 2011 թ. դեկտեմբերին ՌԴ Ամուրի մարզի Ռայչիխինսկ քաղաքի՝ ծնունդով Ջավախքի Բավրա գյուղից հայ ընտանիքին պատկանող ռեստորան են մտել ադրբեջանցիներ և բախում հրահրել։ Ադրբեջանցիներից մեկն ասել էր, որ իր եղբայրներից մեկը մահացել է Արցախի կռիվներում, ինքն էլ մասնակից է պատերազմին. «հայերն ովքե՞ր են, որ գան ու լավ զգան այստեղ» ասել է նա ու ազգային հողի վրա բարձրագոչ ելույթներ ունեցել։ Դրանց ի պատասխան՝ հայերից մեկն ասել է, որ իրենք էլ հարազատներ ունեն կորցրած և ռուսական հողի վրա չարժե շահարկել դա։ Արդյունքում՝ հայկական կողմին հաջողվել է ռեստորանից դուրս հանել իրենց սանձարձակ պահող ադրբեջանցիներին։Նույն օրը, ավելի ուշ ժամի, երբ հայ երիտասարդները փակում էին ռեստորանը, ադրբեջանցիները հետ են վերադարձել զինված, դանակահարել են հայերից մեկին, զենք պահել հայերի վրա, սակայն հայ երիտասարդները կարողացել են զենքը վերցնել ադրբեջանցիների ձեռքից, դրանով կրակել ադրբեջանցիներից մեկի վրա, որի հետեւանքով վերջինս մահացել է։ Դեպքից հետո երկու հայ երիտասարդներից մեկը՝ Միսակ Լազարյանը, 2012 թվականից գտնվում է Հայաստանում, իսկ մյուսի գտնվելու վայրը հայտնի չէ։

Հեղինակ` Իզաբել Սահակյան

Աղբյուր` Փաստինֆո