Փաստ ինֆո

Երևանի ընդհանուր իրավասության դատարանի դատավոր Աննա Դանիբեկյանն այսօր ներկայացել է աշխատանքի, սակայն ՀՀ երկրորդ նախագահ Ռոբերտ Քոչարյանի և մյուսների գործով դատական նիստի օրը դեռևս հայտնի չէ: Այս մասին «Փաստինֆո»-ի հարցմանն ի պատասխան տեղեկացանք դատավոր Աննա Դանիբեկյանի աշխատակազմից: 

Նշենք, որ Աննա Դանիբեկյանն անաշխատունակության թերթիկ էր ներկայացրել մարտի 13-ին, որի համաձայն՝ նա անաշխատունակության մեջ պետք է լիներ մինչև ապրիլի 16-ը:

Ավելի վաղ տեղեկացրել ենք, որ մարտի 17-ին նշանակված Ռոբերտ Քոչարյանի և մյուսների գործով դատական նիստը հետաձգվել էր՝ դատավորի վատառողջ լինելու պատճառաբանությամբ: Իսկ դրանից մեկ օր առաջ՝ մարտի 16-ի երեկոյան, պաշտպանները Ռոբերտ Քոչարյանին անձնական երաշխավորությամբ ազատ արձակելու մասին միջնորդություն էին ներկայացրել դատարան։ Ընդ որում՝ նախապես ճշտել էին դատարանից, որ նշանակված նիստը կայանալու է , բայց չի կայացել։ Ըստ պաշտոնական պարզաբանման՝ դատավորը վիրահատվել էր և պարզ չէր, թե որքան կտևեր հետվիրաատական շրջանը: Օրերս մամուլում տեղեկատվություն տարածվեց, որի համաձայն՝ Աննա Դանիբեկյանը ենթարկվել է քթի վիրահատության՝ պետպատվերով: Դատավորի՝ քթի վիրահատության հրապարակումների առնչությամբ ԲԴԽ-ն հայտարարություն էր տարածել և հորդորել դատախազությանը՝ օրենքով սահմանված կարգով դրանց քրեաիրավական գնահատական տալու համար: Մասնավորապես՝ ԲԴԽ-ն գտել է, որ Աննա Դանիբեկյանի հասցեին հնչեցվել են ոչ միայն բարոյականության տեսանկյունից անընդունելի արտահայտություններ, ինչն ինքնին դատապարտելի է, այլ նաև հրապարակել են օրենքով պաշտպանված տեղեկություններ՝ բժշկական գաղտնիք հանդիսացող տեղեկատվություններ:

Դատախազությունը ԲԴԽ հայտարարությունն ուղարկել է Ոստիկանություն՝ նյութեր նախապատրաստելու հանձնարարականով: Նկատենք, որ ԲԴԽ-ն չի հերքել հրապարակված տեղեկությունները՝ այդպիսով անուղղակի հաստատելով, որ դատավորն իսկապես ենթարկվել է քթի վիրահատության, որի պատճառով շուրջ մեկ ամիս է, ինչ Ռ.Քոչարյանի եւ մյուսների գործով դատական նիստերը չեն կայանում։ Շուրջ մեկ ամիս առաջ ներկայացված խափանման միջոցի վերաբերյալ միջնորդությունն առ այսօր չի քննարկվել: Փաստաբան Հայկ Ալումյանը վերաքննիչ բողոք էր ներկայացրել՝ պահանջելով, որ Ռոբերտ Քոչարյանին անձնական երաշխավորությամբ ազատ արձակելու մասին միջնորդությունը դատարանի կողմից չքննելը, դրա քննությունն անորոշ ժամկետով հետաձգելը ճանաչվի ոչ իրավաչափ: Դատական տեղեկատվական համակարգից տեղեկանում ենք, որ բողոքը մարտի 27-ին մակագրվել էր Վերաքննիչ քրեական դատարանի դատավոր Արմեն Բեկթաշյանին, սակայն առ այսօր չկա որոշում՝ վերաքննիչ բողոքը վարույթ ընդունելու մասին:

Հեղինակ՝ Իզաբել Սահակյան

Աղբյուր` Փաստինֆո