Փաստ ինֆո

Այսօր ԱԺ-ում լրագրողների հետ ճեպազրույցում ԱԺ նախագահ Արարատ Միրզոյանն անդրադարձել է Ամենայն Հայոց Կաթողիկոս Գարեգին Բ-ի հայտարարությանն ու դրան հաջորդող իրադարձություններին:

Հիշեցնենք, որ Վեհափառը լրագրողի հարցմանն ի պատասխան կարևորել էր Ռոբերտ Քոչարյանին կալանքից ազատելը, այս հայտարարությանը հաջորդել էր Ալեն Սիմոնյանի գրառումը, ըստ որի՝ հանրությունը շատ երկար ժամանակ է, ինչ կարևոր է համարում կաթողիկոսի փոփոխության հարցը: Ու նրա մասին արտահայտվել Վեհափառի անուն-ազգանունով։

Դիտարկմանը, թե արդյոք հարիր է ԱԺ փոխնախագահին նման ձեւով խոսել հոգեւոր առաջնորդի մասին՝ Արարատ Միրզոյանն ասաց. «Եթե սկսենք խոսել, թե ում ինչ է հարիր, շատ ասելիք կլինի: Այս պահին անհրաժեշտություն չեմ տեսնում լրացուցիչ որևէ բան ասել: Սա չի նշանակում, որ ասելիք չկա»:

Հարցին, արդյոք Կաթողիկոսի հայտարարությունում աշխարհիկ գործերին միջամտություն տեսնում է, նա պատասխանեց. «Այո, պետությունը եւ եկեղեցին անջատ են եւ պետք է չխառնվեն իրար ներքին գործերին: Միառժամանակ պետք է ասեմ, որ կաթողիկոսը ևս ՀՀ քաղաքացի է եւ ունի բոլոր այն իրավունքները, որոնք ունեն ՀՀ մյուս քաղաքացիները: Այս հարցի մասին լրացուցիչ բան ասելու անհրաժեշտություն չեմ տեսնում, որովհետև ցանկացած նոր բան կարող է նոր երանգ հաղորդել փոխադարձ հայտարարություններին ու դա մեր պետության ու ազգի համար օգտակար չի լինի: Ասելիք ու վերաբերմունք, իհարկե կա, բայց չեմ ուզում ասել, սա անկեղծ և ուղիղ ասում եմ»:

Աղբյուր` Փաստինֆո