Փաստ ինֆո

ԱԺ նախագահ Արարատ Միրզոյանն այսօր լրագրողների հետ ճեպազրույցում հայտնել է, որ ոչ բոլոր պատգամավորների պարգևավճարներն են փոխանցվել կորոնավիրուսի դեմ պայքարի ֆոնդին:

«Համարյա բոլոր պատգամավորների, որովհետեւ 1-2 պատգամավորներ եղան, որ կամ արդեն գումար փոխանցել էին, կամ մարզերից էին: Ամեն դեպքում, գրեթե բոլորի պարգևավճարը փոխանցվել է»,- ասաց նա՝ նշելով, որ աշխատակազմն ստացել է պարգեւավճարը ու նրանց այդ հարցով չի դիմել։

«Այս որոշումն ինձ համար մի քիչ դժվար էր , բայց որոշեցի նման առաջարկությամբ աշխատակազմին չդիմել, դե պարզ է, եթե նման առաջարկով դիմեի, մարդիկ գուցե դժկամությամբ, բայց պետք է համաձայնեին»,-ասաց Միրզոյանը:

Նա շեշտեց, որ երկրորդ եռամսյակի համար հայտարարել է, որ ամբողջ պարգևավճարի ֆոնդը փոխանցեն կորոնավիրուսի դեմ պայքարին:

«Երբ ես հայտարարեցի, որ պարգեւավճարի ողջ ֆոնդը փոխանցվում է կորոնավիրուսի դեմ պայքարին, դժգոհություն արտահայտող մեկնաբանություններ եղան: Տեսակետներ էին արտահայտում, որից հասկացա, որ մարդիկ մտածում են, թե միլիոնավոր դրամներով պարգեւավճար է ստանում պատգամավորը: Պատգամավորի աշխատավարձը 450 հազար դրամի կարգի է, դրա 30 տոկոսի չափով էլ պարգեւավճար է ստանում, որը մոտ 150 հազար դրամ է»,-ասաց ԱԺ նախագահը:

ԱԺ նախագահը տեղեկացրեց, որ ԱԺ-ում պարգևավճար ստանում են բոլոր 700 աշխատակիցները՝ առանց բացառության, եւ հավասար՝ 30 տոկոսի չափով:

Նա միաժամանակ նշեց, որ դժգոհությունների մասին տեղեկացել է մամուլից, որևէ մեկն իրեն անձամբ չի դիմել և չի հայտնել այդ մասին:

Ըստ նրա՝ երկրորդ եռամսյակի համար գուցե ամբողջ պարգեւավճարի ֆոնդը փոխանցեն կորոնավիրուսի դեմ պայքարին:

Հիշեցնենք, որ ՀՀ վարչապետ Նիկոլ Փաշինյանը հայտարարել էր` պետական բարձրաստիճան պաշտոնյաներն իր որոշմամբ մարտի համար պարգևավճար չեն ստանա։ Այդ գումարները կուղղվեն կորոնավիրուսի կանխարգելման աշխատանքներին։

Աղբյուր` Փաստինֆո