Փաստ ինֆո

17 ապրիլ, Երեւան – Հայ օգնության ֆոնդը (ՀՕՖ), միանալով կորոնավիրուսի համավարակի դեմ պայքարին, ապրիլի 2-ից նախաձեռնել եւ իրականացնում է մի շարք հրատապ ծրագրեր, որոնք ուղղված են առողջապահության ոլորտի համար առաջնային բժշկական պարագաների ձեռքբերմանն ու տրամադրմանը, բժիշկների եւ առաջնային օղակի բուժաշխատողների վերապատրաստմանը, ինչպես նաեւ հումանիտար եւ սոցիալական հրատապ անհրաժեշտություն ունեցող կարիքներին:  

Ապրիլի 2-ից Հայ օգնության ֆոնդը Առողջապահության ազգային ինստիտուտի հետ իրականացնում է մի շարք տեսադասընթացներ նոր կորոնավիրուսի կանխարգելման եւ բուժման վերաբերյալ: Տեսադասընթացներին արդեն մասնակցել են 450 բուժաշխատողներ Գեղարքունիքի, Տավուշի, Լոռու, Շիրակի, Սյունիքի, Վայոց Ձորի, Արարատի, Արմավիրի մարզերից, ինչպես նաեւ Երեւանից եւ Արցախից:

Ապրիլի 9-ից ՀՕՖ-ը 1337 առաջնային անհրաժեշտության սննդի փաթեթներ է տրամադրել Տավուշի մարզի 19 համայնքների, ինչպես նաեւ Արագածոտնի տարածաշրջանի Գեղաձոր, Ծաղկահովիտ, Նորաշեն համայնքների մանկապարտեզներ հաճախող երեխաներին, որոնք ընդգրկված են ՀՕՖ-ի Աղքատության հաղթահարումը Տավուշի մարզում եւ Մանկական առողջապահություն ու սնուցում ծրագրերում, եւ կորոնավիրուսով պայմանավորված՝ երկրում արտակարգ դրություն հայտարարելուց հետո պարտեզ չեն հաճախում: Մեկ ամսվա համար նախատեսված սննդի փաթեթները ներառում են հնդկաձավար, ոսպ, բրինձ, հատիկեղեն, մակարոն, բուսական յուղ, ալյուր, աղ, շաքարավազ:

Ապրիլի 10-ին ՀՕՖ-ը 150 հատ 4 տեսակի  պաշտպանիչ արտահագուստ է տրամադրել Երեւանի «Նորք» ինֆեկցիոն կլինիկական հիվանդանոցին, վերապրոֆիլավորված «Սուրբ Գրիգոր Լուսավորիչ» բժշկական կենտրոնին ու Վնասվածքաբանական ու օրթոպեդիայի գիտական կենտրոնին, որտեղ բուժվում են միայն կորոնավիրուսով հաստատված հիվանդները: Հաշվի առնելով բժշկական պաշտպանիչ պարագաների մեծ կարիքը՝ ՀՕՖ-ը շարունակելու է պարբերական աջակցությունը ոչ միայն մայրաքաղաքի բուժհաստատություններին, այլեւ մարզային, այդ թվում՝ Արցախի հիվանդանոցներին: 

«Ցանկացած համավարակ ունի 2 մեծ խնդիր՝ անկանխատեսելիություն/խուճապ եւ հախուռն գործողություններ: Այս խնդիրները կանխելուն եւ հաղթահարելուն նպաստում են առողջապահության մասնագետների կրթումը եւ հանրության իրազեկումը, ինչպես նաեւ մասնագիտական խմբերին առաջնային անհրաժեշտության միջոցներով ապահովումը եւ համակարգված աշխատանքները։ Հայ օգնության ֆոնդը, հիմնադրման օրվանից սկսած, ընդառաջ է գնացել նման մի քանի մարտահրավերներին՝ երկրաշարժ, Արցախյան ազատամարտ, եւ հարուստ փորձ ունի անհետաձգելի առողջապահական ծրագրեր նախաձեռնելու հարցում», - նշել է ՀՕՖ-ի առողջապահական ծրագրերի ղեկավար Համբարձում Սիմոնյանը:

***

Հավելյալ տեղեկությունների համար կարող եք դիմել ՀՕՖ-ի հայաստանյան մասնաճյուղի հաղորդակցության պատասխանատու Մարգարիտ Առաքելյանին՝ զանգահարելով +374 93 521016  հեռախոսահամարով կամ գրելով [email protected]  էլ-փոստին:

Աղբյուր` Փաստինֆո