Փաստ ինֆո

«Սա զավեշտ չէ, սա ծաղր չէ..սա որպես իրավաբան չեմ կարող ասել ինչ է..»,- այսպես է արձագանքել փաստաբան Արամ Վարդեւանյանը՝ ՀՀ երկրորդ նախագահ Ռոբերտ Քոչարյանի գործով դատական նիստը՝ մայիսի 8-ին նշանակելու դատավոր Աննա Դանիբեկյանի որոշմանը։

«Փաստինֆո»-ի հետ զրույցում ՀՀ երկրորդ նախագահ Ռոբերտ Քոչարյանի փաստաբանական խմբի անդամ Արամ Վարդևանյանը հայտնեց, որ, մամուլից տեղեկանալով դատավոր Աննա Դանիբեկյանի աշխատանքի ներկայանալու մասին, մի քանի անգամ փորձել է կապ հաստատել դատավորի աշխատակազմի հետ, որտեղից հայտնել են, որ դատական նիստի վերաբերյալ դեռևս չեն կարող պատասխանել:

Իսկ աշխատանքային օրվա վերջում արդեն հայտնի դարձավ, որ նիստը նշանակվել է մայիսի 8-ին։

Նրա խոսքով՝ շատ դատավորներ իրենց վարույթում քննվող քրեական գործերով անհապաղ դատական նիստ են գումարել՝ սեփական նախաձեռնությամբ, ինչն այս դեպքում չկա: Հարցին, թե արդյո՞ք մինչև՝ Ռոբերտ Քոչարյանին անձնական երաշխավորությամբ ազատ արձակելու մասին միջնորդության քննարկումը պատրաստվում են Ռոբերտ Քոչարյանի խափանման միջոցի փոփոխման վերաբերյալ նոր միջնորդություն ներկայացնել՝ կորոնավիրուսի համավարակով պայմանավորված, Վարդևանյանը պատասխանեց, որ դա դեռևս պետք է քննարկվի, սակայն իրենց կողմից արդեն միջնորդություն էր ներկայացվել Երևանի ընդհանուր իրավասության դատարանի նախագահին՝ խափանման միջոցն անհապաղ վերացնելու վերաբերյալ, որը չի քննվել: «Այդ դեպքում էլ մենք ունեինք ակնհայտ դրսևորված անգործություն»,- նշեց Վարդևանյանը:

Նշենք, որ փաստաբան Հայկ Ալումյանը վերաքննիչ բողոք էր ներկայացրել՝ պահանջելով, որ Ռոբերտ Քոչարյանին անձնական երաշխավորությամբ ազատ արձակելու մասին միջնորդությունը դատարանի կողմից չքննելը, դրա քննությունն անորոշ ժամկետով հետաձգելը ճանաչվի ոչ իրավաչափ: Վարդևանյանը նշեց, որ դատական տեղեկատվական համակարգի համաձայն՝ բողոքը մարտի 27-ին մակագրվել էր Վերաքննիչ քրեական դատարանի դատավոր Արմեն Բեկթաշյանին, սակայն այսօր ապրիլի 17-ն է և որևէ տեղեկատվություն պաշտպանական կողմը չունի: Դատական տեղեկատվական համակարգում առայսօր չկա որոշում՝ վերաքննիչ բողոքը վարույթ ընդունելու մասին:

Ավելի վաղ տեղեկացրել ենք, որ մարտի 17-ին նշանակված Ռոբերտ Քոչարյանի և մյուսների գործով դատական նիստը հետաձգվել էր՝ դատավորի վատառողջ լինելու պատճառաբանությամբ: Իսկ դրանից մեկ օր առաջ՝ մարտի 16-ի երեկոյան, պաշտպանները Ռոբերտ Քոչարյանին անձնական երաշխավորությամբ ազատ արձակելու մասին միջնորդություն էին ներկայացրել դատարան։ Ընդ որում՝ նախապես ճշտել էին դատարանից, որ նշանակված նիստը կայանալու է , բայց չի կայացել։ Հետագայում պարզվեց, որ Աննա Դանիբեկյանն անաշխատունակության թերթիկ է վերցրել մարտի 13-ից մինչեւ ապրիլի 16-ը, որի ընթացքում պետպատվերի շրջանակներում քթի վիրահատություն է արել։ Անաշխատունակության ժամկետը լրանալուց հետո էլ՝ ապրիլի 17-ին հայտնի դարձավ, որ դատավորը հիմա էլ հերթական արձակուրդ է վերցրել մինչեւ մայիսի 7-ը։

Հեղինակ՝ Իզաբել Սահակյան

Աղբյուր` Փաստինֆո