Փաստ ինֆո

Երբ մենք որևէ ծրագիր գործարկում ենք, տեղեկատվական տեխնոլոգիաների մեր մասնագետները պետք է նախապես հաշվարկ անեն և համակարգերն այնպես կառուցեն, որ այդ համակարգերն աշխատանքի ընթացքում չխափանվեն: Այս մասին կառավարության այսօրվա նիստի ժամանակ ասաց ՀՀ վարչապետ Նիկոլ Փաշինյանը այնուհետև դիմելով Աշխատանքի և սոցիալական հարցերի նախարար Զարուհի Բաթոյանին, հետաքրքրվեց 9-րդ միջոցառման դիմումի համակարգի հետ կապված խնդիրը լուծվել է, թե ոչ:

Զարուհի Բաթոյանն ասաց, որ 9-րդ միջոցառումը սպասարկող տեղեկատվական ենթահամակարգը ստեղծվել է չորս օրում. «Ապրիլի 14-ին գործարկվելուց հետո 40 ժամվա ընթացքում ընդունել է 264 801 դիմում, այսինքն րորպեում 110 դիմում: Դրանցից 70874-ը հաջողությամբ ընդունվել է, իսկ 112 հազարը տվյալների սխալ լրացման պատճառով, խնդիրներ են եղել: Հընթացս փորձել ենք հասկանալ որտեղ է խնդիրը: Այստեղ նաև տարբեր բազաների հետ համեմատելու խնդիր կա: Այս հարցը երեկ որոշակի հատվածով լուծել ենք, հիմա առանձին խմբով նաև աշխատում ենք մերժված դիմումները վերլուծելու և հասկանալու, թե որոնք են դրանց պատճառները: Դրանք տվյալների ճշգրտության պատճառ են, այսինքն ճիշտ լրացնելու: Այս ուղղությամբ օգտագործում ենք բոլոր տեղեկատվական հարթակները: Այսօր լրացուցիչ ևս մեկ խումբ ենք ձևավորելու, որը կօգնի մարդկանց հեռախոսով աջակցելու, թե ինչպես պետք է լրացնել: Կան քաղաքացիներ, որ շատ պարզ տեղեկատվության կարիք ունեն, օրինակ ինչ է ՀԾՀ-ն և այլն»,-ասաց նախարարը:

Վարչապետն էլ նկատեց դա նշանակում է, որ մեր լրատվական համակարգը չի աշխատում. «Եթե ՀԾՀ կոչվածը սկզբունքային նշանակություն ունի նրանում, որ մարդը կարողանա ճիշտ լրացնել դիմումը: Հիմա կներեք, բայց ես չգիտեմ ՀԾՀ-ն ինչ է, մի հատ ասեք դա ինչ է: Եթե մենք միջոցառում ենք անում, որտեղ ՀԾՀ-ի բացվածքն իմանալը սկզբունքային կարևոր է, ուրեմն պետք է ուրիշ բանով չզբաղվենք տեղեկատվության ՊՈԱԿ, որպեսզի յուրաքանչյուր քաղաքացի իմանա ՀԾՀ-ն ինչ է, ՀՎՀ-ն ինչ է, էն մյուսն ինչ է: Այսինքն 100 հազար մարդ պետք է զանգի ու այդքան մարդու պետք է ասեք, գիտեք ինչ ՀԾՀ-ն էս ա»,-նշեց Նիկոլ Փաշինյանը:

Զաորուհի Բաթոյանն ասաց, որ կայքը, որտեղ մտնում են լրացնելու, այդտեղ կա, բացի այդ էլ առանձին հրապարակումներ են տարածել ինչ է ՀԾՀ-ն: Վարչապետն էլ ընդգծեց, որ եթե շահառուն չգիտի ինչ է դա, ուրեմն իրենք այնպես չեն արել, որ իմանա:

Նիկոլ Փաշինյանը փոխվարչապետ Մհեր Գրիգորյանին հանձնարարեց ամեն օր երկու ժամը մեկ անձամբ ստուգել, թե ինչպես է աշխատում համակարգը և ինչ է արվում հանձնարարականներն անելու ուղղությամբ. «Այդ օգնությունը չենք ընդունում, որ ուղիղ եթերում ասենք վայ որոշում ընդունեցինք: Դա նրա համար է, որ այդ օգնությունը գնա, մարդկանց տեղ հասնի րոպե առաջ: Հետևաբար ամբողջ պետական համակարգը պետք է ծառայի այդ նպատակին, որ օգնությունը մարդուն տեղ հասնի»,-ասաց վարչապետը:

Աղբյուր` Փաստինֆո