Փաստ ինֆո

Ապրում ենք մի ժամանակաշրջան, երբ քաղաքական թիմը, գործող իշխանությունը ցուցաբերում է զրոյական հարգանք մարդու անձնական տիրույթին, խոսքը գնում է բանկային գաղտնիքի մասին: Այս մասին այսօր ԱԺ-ում, դիմելով ԿԲ նախագահի թեկնածու Մարտին Գալստյանին, ասաց «Լուսավոր Հայաստան» խմբակցության ղեկավար Էդմոն Մարուքյանը։

«Նախկին իշխանությունները ապօրինություն էին անում, իմանում էին, որ բանկում ինչքան փող կամ արժույթ ունի, այսօրվա իշխանությունը չի ուզում ապօրինություն անել, ընդունում է օրենքներ, որ այն, ինչ պիտի ապօրինի աներ, օրենքով անի։ Հիմա ԿԲ-ն որպես ֆինանսական ոլորտում կարծիք արտահայտող ինստիտուտ՝ ոնց է պահելու բանկային գաղտնիքը, ո՞նց եք մեր ներդրողներին համոզելու, որ Հայաստանում անվտանգ է ներդրումներ անել, որ ներդրումների գաղտնիությունը պաշտպանված է այնքանով, որքանով պիտի լինի միջազգային չափանիշներով», - ասաց Մարուքյանն ու ընդգծեց, որ բարձրագույն իշխանությունն անգիր գիտի վերջին հավաքարարից մինչև առաջին բիզնեսմեն՝ ով ինչքան փող ունի բանկերում։

Պատասխանելով Մարուքյանը հարցին, ԿԲ նախագահի թեկնածու Մարտին Գալստյանն ասաց, որ եթե ինչ-որ մեկը կա, որ գիտի Հայաստանում ով ինչքան գումար ունի, դա իրավական տիրույթի հարց է և ինքը չի ուզում մասնակցել նման խոսակցություններին:
«Իմ ուսումնասիրություններն ու իրավաբանների հետ խորհրդատվությունները ցույց են տալիս, որ այն օրենքը, որն այս պահին գտնում է ՍԴ—ում ունի հստակ իրավակարգավորումներ ու հստակ նշված է այն գործերի շարքը, որոնցով կարելի է ինչ-որ գործողություն անել»,-ասաց ԿԲ նախագահի թեկնածուն:

Նրա խոսքով՝ բանկային գաղտնիքին միջամտելու համար դրված են որոշակի ֆիլտրեր, և եթե նախկինում անձը պիտի լիներ կասկածյալ կամ մեղադրյալ, ապա հիմա բանկային գաղտնիքին միջամտելու համար դատախազը կամ նրա տեղակալը պիտի միջնորդություն ներկայացնեն դատարան, ունենան վճիռ, ապա կարողանան գործի շրջանակում գնալ բանկային գաղտնիքի հետևից ՝ ապացուցելով, որ դա վերջին ատյանի որոշում է։

«Պետք չէ խոսել բանկային գաղտնիքի թուլացման մասին, եթե դե ֆակտո կան ֆիլտրեր և կոնկրետ շրջանակ, որն այս պահի դրությամբ այդ իրավակարգավորումները ներառում է», - ասաց Գալստյանը։
Մարուքյանը նկատեց, որ Գալստյանի այս պարզաբանումն իրեն նախկին վարչապետ Տիգրան Սարգսյանի պնդումներն են հիշեցնում՝ տնտեսական ճգնաժամի մասին։

«Տիգրան Սարգսյանն ասում էր՝ «ճգնաժամ մի ասեք, չի գա ճգնաժամը, սուս մնանք չգա», հիմա բանկային գաղտնիքը թուլացվել է, ասում ենք թուլացվել է։ Եթե չի թուլացվել, բա ինչի՞ նախկին իրավակարգավորումները վերանայվեցին։ Մարդ, որը ոչ մի քրեական գործով չի անցնում, ինչի՞ պիտի պետությունը կարողանա մտնի, տեսնի՝ էդ մարդու բանկային հաշիվներում ինչ կա», - նշեց Մարուքյանը։
Գալստյանը վստահեցրեց, որ իրենց կարծիքով այս պահի դրությամբ ֆինանսական կայունության սպառնացող վտանգ չկա։

Աղբյուր` Փաստինֆո