Փաստ ինֆո

Հայ Առաքելական եկեղեցու Արարատյան հայրապետական թեմի առաջնորդական փոխանորդ Նավասարդ Արքեպիսկոպոս Կճոյանին Օֆշորի գործով մեղադրանք է առաջադրվել 8 տարի առաջ նշանակված դատաձեռագրաբանական-դատատեխնիկական փորձաքննության հիման վրա: Այս մասին «Փաստինֆո»-ի հետ զրույցում ասաց Օֆշորի գործով 16 տարվա ազատազրկման դատապարտված, ապա՝ ազատ արձակված Աշոտ Սուքիասյանի պաշտպան Կարեն Հակոբյանը:

«Նախկինում եղել են քննչական գործողություններ ինչպես Սուքիասյանի, այնպես էլ՝ Կճոյանի և Սարգսյանի մասնակցությամբ: Նշված քննչական գործողությունների հիման վրա ըստ էության նոր փաստական տվյալներ հետագայում ձեռք չեն բերվել: Միակ փաստական տվյալը ութ տարի առաջ նշանակված դատաձեռագրաբանական-դատատեխնիկական փորձաքննության եզրակացությունն է, որ պատճենով չէր կարող որևէ համեմատություն կատարել, վերջերս ստացել են եզրակացություն, որ իբրև թե հնարավոր է եղել նույնացնել և եզրակացնել, որ կատարվել է Կճոյանի և Սարգսյանի կողմից: Այնինչ՝ Սուքիասյանն իր ցուցմունքով և՛ նախկինում, և՛ վերջերս տվել և հաստատել է, որ նշված անձինք ստորագրություն չեն կատարել: Իր կողմից ստեղծված սարքով արտատպել է ստորագրությունները՝ ստորագրության նմուշների վրա գրելու միջոցով»,- ասաց փաստաբանը, ապա հավելեց, որ ստորագրության նմուշները Սուքիասյանն ունեցել է, քանի որ եկեղեցական հարցերով ինքն էլ է հանդիսացել Արարատյան թեմի քավոր և այդպես ժամանակին նաև Տիգրան Սարգսյանն է եղել:

Պաշտպանի խոսքով՝ այդ անձինք ուրևէ կապ չունեն, չեն ստորագրել:

«Ըստ էության՝ հրաշք է տեղի ունեցել, որ փորձագետները կարողացել են նույնացնել: Դա հակասում է փորձաքննությունների կատարման մեթոդիկային, որովհետև պատճեններով ոչ մի անգամ ոչ մի փորձագետ կատեգորիկ եզրակացության հանգելու հնարավորություն չի ունենում և խուսափում են կատեգորիկ եզրակացություն տալուց, որովհետև դրա համար կանխատեսված է քրեական պատասխանատվություն՝ սուտ եզրակացության համար»,- ասաց Հակոբյանը:

Հարցին, թե ինչու այդ դեպքում մեղադրանք չի առաջադրվել նաև ՀՀ նախկին վարչապետ Տիգրան Սարգսյանին, փաստաբանը պատասխանեց, որ, այս տրամաբանությանը նայելով, հնարավոր է, որ մի օր դրան էլ գուցե հանդիպենք:

Հարցին, թե արդյո՞ք հնարավոր է, որ Սրբազանի նկատմամբ քրեական հետապնդումը Եկեղեցուն ճնշելու համար է արվում՝ հաշվի առնելով նաև, որ օրեր առաջ Ամենայն Հայոց Կաթողիկոս Գարեգին Բ-ն հայտարարությամբ էր հանդես եկել՝ կապված Ռոբերտ Քոչարյանի խափանման միջոցի հետ, ինչը տարբեր մեկնաբանությունների առիթ էր հանդիսացել, փաստաբանը պատասխանեց. «Շատ հնարավոր եմ համարում՝ հաշվի առնելով այն հանգամանքը, որ այդ եզրակացությունն առնվազն ամիսներ առաջ եղել է իրենց տրամադրության տակ: Այսինքն՝ ամեն օր էլ կարող էին դա անել, ոչ ոք իրենց չէր խանգարում, բայց ես դա զուգադիպություն չեմ համար»:

Պաշտպանը նաև չբացառեց, որ սա կարող է Վճռաբեկ դատարանի նկատմամբ ճնշում գործադրելու նպատակ հետապնդի: Նրա խոսքով՝ նախկինում բարձրաձայնել են Աշոտ Սուքիասյանի նկատմամբ՝ դատավորների մի մասի կանխակալ վերաբերմունքի մասին, որովհետև օբյեկտիվության դեպքում իր վճռաբեկ բողոքը ևս վարույթ կընդունվեր և կքննարկվեր Դատախազության և գործով տուժող՝ Փայլակ Հայրապետյանի բողոքի հետ:

«Հետաքրքիրն այն է, որ, պրակտիկայում եթե հիմքեր են լինում մարդուն մեղադրելու, բացառիկ դեպքերում կարելի է անձի նկատմամբ որպես խափանման միջոց ընտրել ստորագրությունը չհեռանալու մասին»,- ասաց Հակոբյանը՝ նշելով, որ այս գործողությունների կատարման ժամանակը վկայում է, որ նպատակ կա Եկեղեցին վարկաբեկելու:

Հիշեցնենք, որ արքեպիսկոպոս Կճոյանի անունը դեռևս տարիներ առաջ էր շոշափվում օֆշորային սկանդալի մեջ՝ կապված գործարար Փայլակ Հայրապետյանի ունեզրկման հետ: Արքեպիսկոպոս Կճոյանից բացի օֆշորային սկանդալի կենտրոնում էր հայտնվել նաև այն ժամանակվա վարչապետ Տիգրան Սարգսյանը, սակայն հարուցված քրեական գործի շրջանակներում ո՛չ Նավասարդ արքեպիսկոպոս Կճոյանը, ո՛չ Տիգրան Սարգսյանը չեն ներգրավվել որևէ դատավարական կարգավիճակով: Գործով մեղադրանք էր առաջադրվել Նավասարդ արքեպիսկոպոս Կճոյանի սանիկ Աշոտ Սուքիասյանին՝ խարդախությամբ ուրիշի առանձնապես խոշոր չափերով գույքի նկատմամբ իրավունք ձեռք բերելու, հանցավոր ճանապարհով ստացված խոշոր չափերով եկամուտներն օրինականացնելու, չարամտորեն խոշոր չափերով հարկեր, տուրքեր և պարտադիր այլ վճարումներ կատարելուց խուսափելու համար: 2017թ-ին Երևանի ընդհանուր իրավասության դատարանը՝ դատավոր Վարդան Գրիգորյանի նախագահությամբ, մեղավոր էր ճանաչել Սուքիասյանին՝ դատապարտելով ազատազրկման՝ 16 տարի ժամկետով: Դատարանը վճռել էր մոտ 8 մլրդ 919 մլն դրամ բռնագանձել՝ հօգուտ Փայլակ Հայրապետյանի և 632 մլն 403 հազար դրամ՝ հօգուտ Հայրապետյանի որդու: Դատավճռից երկու տարի անց Վերաքննիչ քրեական դատարանը մեղմացրել է Սուքիասյանի մեղադրանքը և անմեղ ճանաչել՝ փողերի լվացման և առանձնապես խոշոր չափերի խարդախություն կատարելու մասով:

2020թ. ապրիլի 13-ին Նավասարդ Կճոյանին հրավիրել են ԱԱԾ և մեղադրանք են առաջադրել առանձնապես խոշոր չափերով փողերի լվացման և խարդախության համար:

Հեղինակ՝ Իզաբել Սահակյան

Աղբյուր` Փաստինֆո