Փաստ ինֆո

Օրերս Ամերիկայի Միացյալ Նահանգների նախագահ Դոնալդ Թրամփը հայտարարեց Առողջապահական համաշխարհային կազմակերպության ֆինանսավորումը դադարեցնելու մասին: «Փաստինֆո»-ի հետ զրույցում ամերիկագետ Լիանա Հովհաննիսյանը նկատեց կարևոր է այն փաստը, որ ոչ թե ընդհանրապես է դադարեցնելու, այլ ժամանակավորապես: Նշված ժամկետը 60-ից 90 օր է:

«Այդ ընթացքում պետք է իրականացվի գնահատում, որպեսզի պարզ դառնա արդյոք ԱՀԿ-ն ադեկվատ է արձագանքել իրավիճակին: Կարծում եմ այս քայլն ունի ներքաղաքական դրդապատճառներ: ԱՄՆ նախագահն ի սկզբանե կորոնավիրուսի հանդեպ դրսևորում էր այսպես ասած ոչ լուրջ կեցվածք, անգամ ասում էր, որ այն հրաշքի նման կանհետանա, սակայն այսօր հիվանդների թիվն ամենաբարձրն ԱՄՆ-ում է: Դա առաջացրել է հանրության դժգոհությունը, ինչն ընտրություններին ընդառաջ ԱՄՆ նախագահի շահերից չի բխում, ուստի նա փորձեց այս քայլով նոր քավության նոխազ ընտրել և մեղմել իր դեմ ուղղված մեղադրանքները»,-ասաց ամերիկագետը հավելելով, որ այս ժամանակն ԱՄՆ-ն կօգտագործի, որպեսզի գտնեն ապացույցներ, որ ԱՀԿ-ն ադեկվատ չի արձագանքել և քավության նոխազի թեզը կփորձեն հենց դրանով ամրապնդել:

Բացի այդ Լիանա Հովհաննիսյանի խոսքով ԱՄՆ նախագահն ի սկզբանե միջազգային կառույցների հանդեպ հանդես է եկել թերահավատ դիրքորոշմամբ. «Անգամ ԱՄՆ-ի համար տարիներ շարունակ կարևորություն ներկայացնող ՆԱՏՕ-ն, որտեղ ԱՄՆ-ն միշտ հանդես է եկել առաջնորդի դերում և նախկին նախագահների ժամանակ էլ մեծ ներդրումներ է իրականացրել, այժմ ԱՄՆ նախագահն արդեն քաղաքականությունը փոխում է նշելով, որ յուրաքանչյուր երկիր հավասար ներդրում պետք է ունենա անվտանգության պաշտպանության համար: Հիմնական միտումն այն է, որ ԱՄՆ նախագահն ավելի շատ հավանություն է տալիս երկկողմ հարաբերությւոններին, որովհետև այդ հարաբերություններում հստակ է ինչը ինչի դիմաց քաղաքականություն է, իսկ ԱՄՆ ներկայիս նախագահն ավելի շատ հավանություն է տալիս փոխշահավետ համագործակցությանը»,-ասաց Լիանա Հովհաննիսյանը:

Վերջինս կարծում է ԱՄՆ-ն ընտրություններին ընդառաջ կփորձի հիմնավորել ԱՀԿ-ին ուղղված մեղադրանքները, սակայն ընտրությւոններից հետո հնարավոր է հետ կանգնի այդ քայլից: Լիանա Հովհաննիսյանը նշում է, որ մինչև այս հայտարարությունն արդեն իսկ 2021 թվականի բյուջեով շուրջ 65 մլն-ով կրճատվել էր ԱՀԿ-ին տրամադրվող ֆինանսավորումը, այսինքն մինչ այս Դոնալդ Թրամփն արդեն նպատակաուղղված տանում էր իր այս քաղաքականությունը. «Հնարավոր է, որ ընտրություններից հետո ԱՄՆ նախագահը հետ կանգնի ֆինանսավորումն ընդհանրապես դադարեցնելու գաղափարից, բայց կրճատումներ ամեն դեպքում կլինեն»,-հավելեց ամերիկագետը:

Անդրադառնալով այս հարցում Չինաստանի գործոնին Լիանա Հովհաննիսյանը բնական համարեց դա, քանի որ Թրամփը  Ռուսաստանին և Չինաստանին դիտարկում են որպես մրցակիցներ. «ԱՄՆ-ն մեղադրում է ԱՀԿ-ին Չինաստանի հանդեպ սուբյեկտիվ կողմնակալ դիրքորոշում որդեգրելու մեջ: Հիմնական թեզն այն է, որ ԱՀԿ-ն չի կարողացել Չինաստանին սաստել, որպեսզի Չինաստանը հնարավորինս կանխեր վարակի տարածումը»,-եզրափակեց Լիանա Հովհաննիսյանը:

Հեղինակ Հասմիկ Կոշկարյան

Աղբյուր` Փաստինֆո